Umuti wongerera abagabo amashagaga mu gutera akabariro wakumiriwe ku bagore batwite

Nyuma y’uko abana 11 bapfuye bazize indwara z’ibihaha kubera umuti wa Viagra cyangwa "Sildénafil" wahawe ababyeyi babo nyamara wari usanzwe ukoreshwa mu kongerera akanyabugabo abagabo bafite ibibazo mu gutera akabariro, Abashakashatsi bo mu Buholandi bahise bahagarika igerageza bari barimo gukorera ku babyeyi batwite.

Ku wa Mbere w’iki Cyumweru nibwo Amsterdam University Medical Center yatangaje ko igerageza yakoreraga ku bagore batwite yifashishije uwo muti ryahagaritswe.

Igerageza ryakorewe ku bagore 183 batwite bafite abana bagaragazaga gukura nabi mu nda ndetse bafite ibyago byo kuba bapfa bavuka cyangwa bataravuka.

Uku kuvuka umwana adashyitse bishobora guterwa n’uko umubyeyi afite ibibazo by’umuvuduko ukabije w’amaraso cyangwa diabète.

Ubusanzwe igitera abagabo kwifashisha Viagra, ni uko uyu muti wifitemo ubushobozi bwo kwagura no gutuma imitsi y’ubugabo ihaguruka vuba, bisobanuye ko icyo gihe amaraso yoherezwa mu gitsina ku muvuduko n’ubwinshi budasanzwe, bikagifasha guhagarara cyemye.

Icyo abashakashatsi baheragaho, ni ukuba niba ‘Viagra’ ishobora kwagura imitsi y’igitsina, yanashobora kwagura imitsi igize ingobyi itunganyirizwamo ibitunga umwana mu nda, bityo bikaba byakwihutisha urujya n’uruza rw’ibimutunga, binamufasha gukura neza akiri mu nda.

Yaba imitsi y’ingobyi umwana aba arimo nk’uruganda rw’ibimutunga, rwaba n’urureri ubusanzwe narwo ruremye mu buryo bw’umutsi munini uhuza umwana na nyina, ngo ‘Viagra’ yari kwagura imitsi y’ingobyi, n’ahanyuzwa ibimugemuriwe, umwana akabyibuhira mu nda mu buryo budasanzwe.

Icyakora abashakashatsi basanzwe bidashoboka ahubwo kwifashisha uwo muti byongera ubunini bw’udufuka tw’amaraso mu bihaha, bikongera ibyago byo kuba abana bapfa bakivuka.

Hari ubundi bushakashatsi nk’ubwo bwakorewe mu Bwongereza mu umwaka ushize ariko nta tandukaniro n’ubu bushya nk’uko CNN yabitangaje.

Mu bagore bakoreweho ubushakashatsi, 19 abana babyaye barapfuye barimo 11 bishwe n’indwara z’ibihaha.

Umwe mu bakoze ubu bushakashatsi wo mu Ishami rishinzwe kuvura indwara z’abana muri Kaminuza ya Houston muri Leta Zunze Ubumwe za Amerika, Dr. Mohan Pammi, yavuze ko icyari kigamijwe kwari ukureba uko Viagra yakwifashishwa mu gutuma umwana agira ubuzima bwiza akiri mu nda, ndetse agakurana ibiro bihagije.

Umuvugizi w’uruganda Pfizer rukora umuti wa Viagra ku Isi, Dervila Keane, abajijwe icyo atekereza ku byatangajwe n’aba bashakashatsi, yavuze ko ntacyo uruganda rwabivugaho kuko batarwitabaje bajya kubukora.

Ishami ry’Umuryango w’Abibumbye ryita ku Buzima (OMS) ritangaza ko hagati ya 60% na 80% by’abana bapfa nyuma gato yo kuvuka, bituruka ku kuba bavukana ibiro bidahagije.

Ni ukuvuga ko abana miliyoni 20 ku mwaka bavukana iki kibazo, bahwanye na 15,5% by’abana bavuka ku Isi yose. Muri abo kandi 96,5% biganje mu bihugu bikiri mu nzira y’amajyambere.

PNG - 264.8 kb
‘Viagra’ ubusanzwe ni umuti usanzwe ukorehswa mu kongerera abagabo amashagaga (Akanyabugabo) mu gutera akabariro

@Umubavu.com





Tanga igitekerezo kuri iyi nkuru



Igitekerezo
Sebagabo Kuya 10-10-2018

Ahubwose niba viagra itera akanyabugabo ku bashaka gutera akabariro mwadusobanuriye buryo ki uwo muti uva mugitsina-gabo ukajya muri nyababyeyi,cg se n’umugore utwite udasabwa kuwukoresha?

Sebagabo Kuya 10-10-2018

Ahubwose niba viagra itera akanyabugabo ku bashaka gutera akabariro mwadusobanuriye buryo ki uwo muti uva mugitsina-gabo ukajya muri nyababyeyi,cg se n’umugore utwite udasabwa kuwukoresha?