Ubuzima bw’uwahoze ari Perezida wa Kenya Daniel Arap Moi bukomeje kwanga

Uwahoze ari Perezida w’igihugu cya Kenya, Daniel Arap Moi yerekeje mu gihugu cya Isirayeli kugira ngo ahabwe ubuvuzi burenze ku bwo yahabwaga mu gihugu cye nyuma yuko akomeje kuribwa mu ivi rye ryagize ikibazo mu mpanuka yakoze dore ko ryanaherukaga kubagwa mu mwaka ushize.

Ubwo bageraga mu bitaro byo mu mugi wa Tel Aviv, amakuru avuga ko uyu mukambwe w’imyaka 94 atishimiye koherezwa kuvurirwa mu gihugu cya Isirayeli byatumye atabyumva kimwe n’umuhungu we, Gideon Moi ndetse n’umuganga we David Silverstein.

Umuganga w’uyu musaza avuga ko icyabateye gufata icyemezo cyo kumwohereza muri Isirayeli, ari ukugira ngo ahabwe izindi nama zijyanye n’ubuvuzi bwe n’abandi baganga hagamijwe kureba ko uburibwe yakomeje kugira kuva abazwe bwakira.

Kuri iki Cyumweru tariki ya 11 Werurwe 2018 nibwo umukambwe, Daniel Arap Moi yafashe rutemikirere yerekeza mu gihugu cya Isirayeli kugira ngo ahabwe ubuvuzi burenze ku bwo yari asanzwe ahabwa n’abandi baganga b’inzobere.

Ikinyamakuru Daily Nation cyanditse iyi nkuru kivuga ko umusaza Moi yarinze iyo agera mu bitaro by’I Tel Aviv atabyumvikanaho n’umuhunguwe ndetse n’umuganga we kuko we yumvaga yakagombye kuvurirwa mu gihugu cye cya Kenya.

Aganira n’itangazamakuru umuhungu wa Moi, yavuze ko icyabateye gufata icyemezo cyo kohereza uyu musaza kuvurirwa muri Isirayeli ari uburibwe bukabije yari amaze igihe agaragaza bityo abandi baganga bakaba bashobora kugira icyo bamumarira kirenze ku byo yakorewe.

Kuva mu mwaka ushize wa 2017 nibwo uyu musaza yatangiye kuribwa mu ivi bikomeye nyamara nta gihe kinini cyari gishize abagiwe mu bitaro bya Agha Khan.

Uretse kuba umuntu yavuga ko n’ubusaze burimo, intandaro y’ibi byose ni impanuka uyu mukambwe yakoze mu mwaka wa 2006 ubwo yakoraga impanuka ari mu modoka ye yo mu bwoko bwa Range Rover akagongana na Pick up ahitwa Limuru.

Daniel Arap Moi yavukiye ahitwa Sacho tariki ya 2 Nzeli 1924. Yabaye Perezida wa Kenya kuva 1978 kugeza 2002.

PNG - 1.1 Mb
Daniel Arap Moi wabaye Perezida wa kabiri wa Kenya

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo