USA: Umwana w’imyaka 9 yishe mushiki we w’imyaka 13 amurashe

Umwana w’imyaka 9 wo muri Leta ya Mississipi muri Leta Zunze Ubumwe za Amerika yarashe mushiki we bari mu nzu bari gukinana imikino yo kuri mashine “Video game”, ariko umukobwa mukuru w’imyaka 13 aza kwima mugenzi we Controller (igikoresho bifashisha bayobora umukino) biramurakaza ahita amurasa.

Polisi yo mu Ntara ya Mississippi muri Leta Zunze Ubumwe za Amerika ivuga ko umwana w’umuhungu w’imyaka 9 gusa yarashe mushiki we w’imyaka 13 akamwica, bapfuye ibikinisho.

Uwo mukino ni umwe uzwi nka "video game" mu Cyongereza, aho abawukina bafata igikoresha bita "controller" bagakina nk’umupira w’amaguru cyangwa bagasiganwa n’imodoka kuri televiziyo.

Polisi ivuga ko uwo muhungu yafashe imbunda akarasa mushiki we agahita yitaba Imana nyuma yo kumwimwa igikoresho bifashisha bayobora umukino.

Umukobwa akimara kuraswa yahise ajyanwa mu bitaro bya Memphis, ari naho byaje gutangarizwa ko yashizemo umwuka, gusa kugeza ubu ntiharamenyekana uko uyu mwana yaba yabonye imbunda nk’uko BBC ibitangaza.

Muri America hakomeje kugaragara ibyaha byinshi bishingiye ku ikoreshwa ry’intwaro n’ubwo Perezida Trump aherutse gutangaza ko agiye no guha abarimu uburenganzira bwo gutunga imbunda hagamijwe kwicungira umutekano.

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo