Siriya: Abantu 53 bishwe n’indege z’intambara z’u Burusiya

Kuri iki cyumweru tariki ya 26 Ugushyingo, mu gihugu cya Siriya abantu bagera kuri 53 barimo abana 21 barishwe abandi 18 barakomereka mu bitero byakozwe n’indege za gisirikare z’u Burusiya mu duce tugenzurwa n’umutwe wa Kiyisilamu mu burasirazuba bw’igihugu cya Siriya.

Ibi bitangazwa n’ishyirahamwe rigenzura iyubahirizwa ry’uburenganzira bwa muntu muri Siriya ariko rifite icyicaro mu gihugu cy’u Bwongereza.

Iryo shyirahamwe rivuga kandi ko ibyo bitero byakozwe mu bihe bitandukanye mu nzu zibamo abantu mu bice by’ahitwa Al-Chafah, ku nkengero z’uruzi Euphrate, mu ntara ya Deir Ezzor.

U Burusiya bufatanyije na Perezida wa Siriya Bachar al-Assad, bwagabye ibitero by’indege kuva mu kwezi kwa cyenda mu mwaka wa 2015, ibyatumye abasirikare ba Leta ya Siriya bongera kwigarurira ibirindiro bari batwawe na ISIS ndetse n’indi mitwe irwanya Leta.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo