Rwanda: Abantu 10 bakize COVID-19, abanduye ubu ni 285

Kuri uyu wa Mbere tariki ya 11 Gicurasi 2020, abantu 10 basezerewe mu bitaro nyuma yo gusuzumwa bagasangwa barakize Coronavirus mu gihe umuntu umwe yasanganywe ubwandu bwayo mu bipimo 380 byafashwe kuri uyu munsi.

Ibi byasize mu Rwanda hamaze kuboneka abantu 285 bayanduye mu bipimo 42 805. Ni mu gihe abamaze gusezererwa mu bitaro bakize COVID-19 bamaze kugera ku 150.

- Abanduye ni 285 (barimo umwe mushya)
- Abakize ni 150 (barimo 10 bashya)
- Abakirwaye ni 135
- Nta muntu uritaba Imana
- Ibipimo bimaze gufatwa ni 42 805 (birimo 380 bishya)

Umubare w’abamaze gukira iki cyorezo uraruta uw’abakirwaye (abantu 150 bamaze gukira COVID-19 mu Rwanda mu gihe 135 ari bo bakirwaye).

Nubwo kugeza ubu mu Rwanda nta muntu urahitanwa na COVID-19 nkuko inzego z’ubuzima zibivuga, abaturage basabwa gukomeza kubahiriza amabwiriza yashyizweho mu kwirinda ko iki cyorezo cyakwirakwira hirya no hino mu gihugu ibintu bikaba byarushaho kuba bibi.

Umurwayi wa Mbere wa Coronavirusu yagaragaye ku butaka bw’u Rwanda ku wa 14 Werurwe 2020, uyu yari Umuhinde wari uturutse mu Mujyi wa Mumbai.

Ni mu gihe iyi ndwara yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 232 351 bamaze kuyandura ku Isi yose, barimo 285 743 yahitanye na 1 517 483 bamaze kuyikira.





Tanga igitekerezo kuri iyi nkuru



Igitekerezo