Nyamasheke: Ku kigo Nderabuzima Cya Ruheru abarwayi bashotse imibande kwishakirayo amazi banywesha imiti

Mu Murenge wa Kanjongo mu kagali Raro habarizwa Ikigo Nderabuzima cya Ruheru cyakira abaturage bo mu tugari twa Susa, Raro, Kigarama n’abaturutse imihanda yose.

Muri ino minsi iki kigo nderabuzima gihangayikishijwe no kubura amazi kuko hashize hafi amezi umunani Akarere ka Nyamasheke kababeshya ko ikibazo kigomba gukemuka amaso akaba yaraheze mu kirere.

Biratangaje kandi biteye inkeke kubona ikigo nka kiriya cya Leta kitagira amazi kandi abayobozi mu nzego zitandukanye ikibazo bakizi bakaguma bizeza abaturage ibyo badashyira mu bikorwa.

Umuhanga mu mitekerereze yavuze ko "L’eau est la vie", amazi ni ubuzima, bivuze ko atabonetse ari ugupfa.

Umurwayi twavuganye witwa Umubyeyi Grace yatubwiye ko kunywa imiti umuforomo yakwandikiye ubwabyo ari ikibazo ubwo se twaba turi kuvurwa?

Nkuko twabitangarijwe n’umuforomo utashatse ko amazina ye atangazwa yavuze ko indwara bari kwakira inyinshi ari izituruka ku mwanda.
Yagize ati "turi kwakira abana bazahajwe n’inzoka zo mu nda ,Diarrhea,....

Mu mpera z’umwaka wa 2016 akarere ka Nyamasheke katangije igikorwa cyo kubaka umuyoboro w’amazi uturuka mu kagali ka Susa ugaca mu kagali ka Raro ndetse na Kigarama ugera mu kagali ka Kibogora.

Icyo gihe ingeri zose z’abaturage zarishimye kuko bari bizeye ugucyemuka kw’icyo kibazo nyamara siko byagenze.

Umuturage utashatse ko amazina ye atangazwa yabwiye Umubavu.com ko amazi yayoborewe I kibogora ahaba abakire ndetse hakaba hataha abayobozi benshi b’Akarere ka Nyamasheke.

Mu Mwiherero ushize w’abayobozi b’igihugu, Perezida wa Repubulika Nyakubahwa Paul Kagame yibukije abayobozi ko abo bakorera bagomba kuza imbere mbere yuko bitekerezaho ari abanyarwanda.

Undi muturage yavuze ko kibogora ituwe n’abakire gusa ko bo batabura amazi. Yagize ati "Nawe Meya ataha I Kibogora, Vice Mayors (FED na Social) n’abayobozi batandukanye mu mashami atandukanye niho bataha. Ubwo se nabona amazi bakayabura? Ariko si uko byagakwiye kugenda, nibayabone natwe tuyabone kuko Leta iba yatanze amafaranga menshi.

Twashatse kumenya icyo ubuyobozi bw’ikigo nderabuzima bwakoze kuri iki kibazo mu ijwi rituje umuyobozi wacyo adusubiza agira ati "Ndi mu nama".

Ku murongo wa Telephone twagerageje kuvugana n’umuyobozi w’Akarere ntiyafata Telefoni ariko turakomeza kugerageza.

Nsengumuremyi Denis Fabrice

@Umubavu.com





Tanga igitekerezo kuri iyi nkuru



Igitekerezo
Indatwa Kuya 22-11-2018

Mubyukuri umurenga wa Kanjongo iyo witegereje ubona urimo ibice 2 igice cyabitwa abakire nabayobozi kuburyo aricyo gice kigerwamo ibintu byoza kikaba aricyo cyibona ayomazi naho ikindi cyo cyabaye intabwa kuburyo nokubona amazi yokunywa aricyaha.Gusa murakoze kutuvugira kandi ntimuzahweme kugeza igihe byibura umuturage arenganurw.