Musanze : Uwari urwariye COVID-19 mu rugo yasanzwe mu nzu yapfuye

Umuturage witwa Habonimana Joseph wari urwariye COVID-19 mu rugo aho yari acumbitse mu Kagari ka Cyabagarura mu Murenge wa Musanze mu Karere ka Musanze, bamusanze mu nzu yapfuye.

Uyu Nyakwigendera Habonimana Joseph wasanzwe mu nzu yapfuye, yari asanzwe ari umucungamutungo w’ikigo cy’amashuri cya Virunga Valley Academy cyo mu Murenge wa Musanze.

Urupfu rwa Habonimana rwamenyekanye ahagana isaa yine n’igice z’igitondo kuri uyu wa Kabiri tariki 06 Nyakanga 2021.

Abaturanyi bamusanze yashizemo umwuka, bagize amakenga yo kubona uyu mugabo wari usanzwe arwaye Covid-19 ariko akurikiranwa ari mu rugo ageze ayo masaha atari yabyuka.

Muri uko kugira amakenga bagerageje gukomanaga ku rugi ntiyakingura bafata icyemezo cyo gukuraho umwenda ukingiriza idirishya, babona aryamye hasi agaramye mu buryo budasanzwe niko kwica urugi basanga yashizemo umwuka.

Abaturanyi be biyambaje inzego z’ubuyobozi nazo ziyambaza Polisi na RIB, Ubuyobozi bugirwa inama ko umurambo w’umuntu wari urwaye Covid-19 ukwiriye kwegerwa ari uko inzego z’ubuvuzi zibifitiye ububasha zihageze.

Umunyamabanga Nshingwabikorwa w’Umurenge wa Musanze, Dushime John yavuze ko bategereje abaganga babihuguriwe maze umurambo ujyanwa ku bitaro bikuru bya Ruhengeri kugira ngo hapimwe nimba ari C0vid-19 koko yishe uyu mugabo usize umugore n’umwana umwe.

Gitifu Dushime John yavuze ko uyu mugabo wapfuye yari arwaye Covid-19 akaba yarabanje kuvurirwa kwa muganga nyuma aza koroherwa,arataha akomeza kwitabwaho ari mu rugo.

Ati “Yaherekejwe n’abaganga babiri batanze amabwiriza ku bantu babanaga nawe mu gipangu, babereka uko bakwiye kujya bamukurikirana. Nyuma yuko ku wa mbere yari yagezweho n’inzego z’ubuzima zikareba uko amerewe ndetse nabo baturanyi bakaba bari baraye bamuvugishije, byashoboka ko yaraye akomerejwe mu gicuku ari nabyo byaba byamuviriyemo gupfa.”

Umunyamabanga nshingwabikorwa w’umurenge wa Musanze yasabye abaturage b’umurenge ayoboye ndetse n’Abanyarwanda bose kurushaho kwirinda no gushyira mu bikorwa ingamba n’amabwiriza yo kwirinda COVID-19.

Yagize ati : “Mu murenge wa Musanze tugomba gukomeza ingamba zo kwirinda ndetse tukarushaho cyane.”

Mu minsi ishize na none mu murenge wa Musanze mu kagari ka Cyabagarura mu mudugudu wa Gaturo, uwitwa Ntakirutimana Florence w’imyaka 28 wari usanzwe akora mu nzu itunganya imisatsi nawe yitabye Imana azize COVID-19 nawe akaba yari arwariye mu rugo.

Ibi bibaye nyuma y’uko Umuyobozi w’ibitaro bikuru bya Ruhengeri, Dr Muhire Philbert, avuze ko gahunda yo gukurikiranira mu rugo abarwaye COVID-19 byatanze umusaruro, aho ndetse byagaragaye ko abarwayi 1077 bo mu Karere ka Musanze bakurikiranirwaga mu rugo tariki 06 Nyakanga batanga icyizere cyo gukira.

Umuseke





Tanga igitekerezo kuri iyi nkuru



Igitekerezo