Musanze: Arashengurwa n’akato yahawe n’umuryango we nyuma yo kwadukwaho n’indwara y’amayobera

Umubyeyi witwa Uwimana avuga ko iyi ndwara yamufashe mu mwaka wa 2011, aho ijoro rimwe yaryamye ari muzima bugacya mu gahanga haje agaheri gato kamurya ari nako kaje kumuviramo indwara yayoberanye yanatumye ahabwa akato mu muryango we.

Uwimana agira ati “Naraye ndi muzima mbyutse mu gitondo numva ku gahanga harandya mbifata nk’ibyoroshye ngira ngo ni akantu kandumye. Nasizeho pomade uburibwe bukomeza kwiyongera.”

Avuga ko uko iminsi yashiraga ariko ako gaheri kakomeje gukura agana ivuriro agera ubwo ibitaro bya Ruhengeri bimwohereza mu bitaro bikuru bya Kigali (CHUK).

Ngo kwivuriza i Kigali ntibyamworoheye kuko atahawe serivisi nziza, rimwe bikamuca intege ntiyitabire itariki yahawe kuko yari amaze kunanirwa kubera ingendo yakoraga ntanavurwe kandi nta n’amikoro yari afite.

Ati “Nagiyeyo inshuro nyinshi batampa imiti ngo bambwire n’uburwayi mfite bakanyandikira kuri taransiferi ngataha ubusa bigeze aho ndaparika sinasubirayo.”

Avuga ko hari n’ubwo yatekereje kujya kwivuriza i Kanombe abisabwe n’umusirikare bari bahuriye mu nzira, abura amikoro arabireka.

Ati “Kugeza iyi saha nta bisubizo nigeze mbona kuri ubu burwayi, hari ubwo nigeze guhura n’umusirikare angirira impuhwe ansaba kujya mu bitaro by’i Kanombe muri ya minsi igihe i Kanombe hari abasirikare babaga imitwe n’ubwonko, mbuze amikoro no kutagira mituweri, ndabireka.”

PNG - 796.8 kb
Uwimana ngo ashengurwa n’akato yahawe n’umuryango we


Akato yahawe mu muryango we ni ko kamushengura umutima. Mu burwayi bwe ngo ababazwa no guhabwa akato n’umuryango we dore ko yanatandukane n’umugabo we bafitanye abana bane, nyuma yo guhora amuzaniraho abandi bagore.

Yongeraho ko na nyina nk’umubyeyi yari asigaranye nyuma y’uko ise apfa yamwirukanye mu rugo no mu mitungo y’umuryango. Ahandi yari yizeye icumbi ni kwa musaza we ariko naho ngo ntiyahamaze kabiri kuko bahise bamwirukana none ubu arara aho bwije.

Avuga ko abagiraneza ari bo bamubeshejeho, nyuma y’uko umuryango we umutereranye kubera ubwo burwayi. Ati “Uko mbayeho ni Imana yo mu ijuru inyitungiye. Ndya ari uko mpuye n’umuntu akangirira impuwe akampa amafaranga. “Ntaho kuba mfite uretse nk’abaturanyi bamfasha rimwe umwe akancumbikira ejo ngacumbikirwa n’undi.”

Uwimana avuga ko inzego z’ubuyobozi bw’ibanze zitamubaniye kuko banze kumushyira mu cyiciro cy’ubudehe ubu akaba nta na mituweri agira ati“Umuyobozi w’umudugudu yanze kumpa icyiciro anyohereza mu Mutara ku mugabo twatandukanye ngo abe ariho bampa icyiciro. Nanze kujyayo kuko ntiwaba waratandukanye n’umuntu ngo usubireyo ngo urashaka ibyiciro.

Kuba ntagira icyiciro byatumye ntabona mituweri, ubu ndaho gusa nta mituweri mureba ubu burwayi mfite.”

Arasaba Leta ubufasha kugira ngo yivuze kuko uburwayi bwe butangiye gufata indi ntera dore ko uko bwije n’uko bukeye akomeza kuremba.

PNG - 796.8 kb
Uwimana ngo ashengurwa n’akato yahawe n’umuryango we


Ageze ku rwego rwo kutakibasha kubona no guhora aribwa umutwe ati “Leta nimpe inkunga nivuze kuko niyo mubyeyi nsigaranye, nibinanirana mvuge ngo biranze ariko Leta nimfashe kuko ndababaye. Ndi nyagupfa uretse Imana yo mu ijuru niyo izi ibyanjye.”

Mu kwiyibagiza ububabare, Uwimana atunzwe no kugana ahabera amasengesho ubundi iyo abonye amafaranga agura ibinini muri za farumasi bimworohereza uburibwe bw’umutwe.

Aravuga ko akomeza kuremba aho yabashaga gusoma, ariko Bibiriya ubu akaba ageze aho atabasha kubona inyuguti n’imwe.

Manzi Jean Pierre, Umunyamabanga Nshingwabikorwa w’Umurenge wa Muhoza, avuga ko atigeze amenya ikibazo cya Uwimana asaba ko yamusanga ku Murenge bakiga kuri iki kibazo.

SRC: Kigali Today





Tanga igitekerezo kuri iyi nkuru



Igitekerezo
Gjm Kuya 19-03-2018

Naze i Kigali mwereke aho bamuvura. Cg ampamagare kuri 0780819710

Janvier Niyomugaba Kuya 23-02-2018

Uwimana uyu yagiriwe ubuntu ubu kuko mubitaro bya gisirikare ikanombe baramubaze none amerewe neza ari koroherwa.

Gitangazafrujance Kuya 23-02-2018

Jyakwamuganga