Munyaneza Innocent yivuganye umugore we amuziza kumwanduza SIDA

Kuri uyu wa Gatanu tariki 9 Gashyantare 2018, I Gasogi mu kagari ka Rudashya, Umurenge wa Ndera, akarere ka Gasabo ho mu Mujyi wa Kigali, Umugabo yishe umugore bigeze kubana nk’umugore n’umugabo ndetse bakaba bari banafitanye umwana aho yamujije ko uyu mugore yamwanduje SIDA.

Munyaneza Innocent akurikiranyweho kwica umugore we dore ko anabyemera. Uyu mugabo yari atuye muri Nyarugunga akaba yishe umugore we Mukeshimana Rebecca bari barigeze kubana nk’umugore n’umugabo ndetse bakanabyarana umwana umwe.
Uyu Nyakwigendera yakoraga imirimo yo mu rugo aho yakoraga mu rugo rw’uwitwa Havugimana mu mudugudu w’Akamahoro ndetse akaba ari naho uyu mugabo we yamusanze.

Umunyamabanga Nshingwabikorwa w’Umurenge wa Ndera, Iyamuremye Francois yemeje aya makuru maze abwira Ukwezi.com ko uyu musore koko yemera ko ariwe wishe uyu nyakwigendera ndetse akavuga ko icyatumye amwica ari uko yamwanduje agakoko gatera Sida.

Gitifu Francois yagize ati “Nibyo koko natwe umusore yabitwemereye ndetse avuga ko icyatumye amwica ari uko uyu mukobwa yamwanduje Sida, urumva rero twe nta kindi twarenzaho umusore yashyikirijwe ubugenzacyaha kugirango busuzume neza icyaha yakoze”.

Gitifu kandi yavuze ko uyu musore ubu yamaze kugera mu maboko ya Polisi y’u Rwanda ikorera mu Mujyi wa Kigali aho agiye gukorerwa dosiye.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo