Kwiga ingeso z’uwo muzambikana impeta si ikintu cyoroshye na gato

Iyo umusore n’inkumi bashimanye, maze bakaba bari mu mugambi wo kuzubakana urwabo, ngo burya ibyo kumarana igihe kinini ngo barimo kwigana ingeso ntacyo byafasha nkuko umuntu utarashatse ko amazina ye tuyatangaza yabitubwiye ashingiye ko ngo bigoye kumenya umuntu wese uko ateye mutarabana mu nzu imwe cyane ko hashobora no kuvamo kurambirana hagati y’abakundana.

Uyu waganiriye n’Umunyamakuru w’Umubavu.com yatangiye agira ati “Ba sokuru baravuze ngo “Zirara zishya bwacya zikazima!”.

Iyi mvugo irerekana uburyo, iyo umusore cyangwa inkumi yihenze k’uwo bubakana cyane cyane mu ngeso dore ko arizo zituma bahuza muri gahunda by’urugo rwabo, byanga byakunda birashyira bikagira ingaruka ku buzima bwabo bwose bw’urugo.

Ikibazo gikomeye ni icyo kumenya uburyo umusore cyangwa inkumi igeze mu kigero cyo gushaka iri bubigenze kugira ngo habeho gutahura ingeso z’uwo bagiye kubana urwabo.

Bucya bucyana ayandi!

Ngo “nta mubande utagira nyiramubande!. Ni nayo mpamvu nta muntu n’umwe kuri iyi si ya Rugira utagira ubusembwa cyangwa ingeso akenshi usanga itanyura uwo yihebeye.

Uyu twaganiriye yagize ati “Jyewe nemeza ko kumarana igihe kirekire ngo uri kwiga ingeso z’uwo washimye ntacyo bimaze. Ushobora kwangana n’uwo mwakundanaga kubera ingeso runaka umubonyeho, ukaresha undi ugasanga nawe afite indi ngeso mbi kuruta iy’uwa mbere, kuko bombi ari abantu. Umunyarwanda yagize ati “wirukana umugore uguguna igufwa ukazana urimira bunguri!”.

Ikindi ni uko hari igihe kigera bitewe n’imibereho, umuntu agahindura ingeso ze ku buryo bunyuranye. Maze kumva inshuro zitari nkeya mu matwi yange aho umugore cyangwa umugabo usanga yadukana ingeso atari asanganywe mu mibereho ye bitewe n’ihinduka ry’ubuzima byaba mu buryo bwiza cyangwa bubi. None se nyuma y’ibi, by’umwihariko mbere y’uko umusore n’inkumi bubaka, hari uba uzi ko ibi bizababaho mu rugo rwabo?

Ku rundi ruhande, hari igihe umusore areshya indi nkumi y’ingeso yibwira ko zizatuma urugo ruhindamo amahoro ariko nyamara bigakomeza kuba agatereranzamba nyuma yuko bashakanye. Ni byo twita guhisha ingeso cyangwa kwiyoberanya k’umuntu.

Burya ntawanga guhuza n’uwo yihebeye!

Abashyize hamwe n’Imana irabasanga. Iyo umusore n’inkumi bashimanye, maze bakiyumvamo ko bakwiye gushinga urugo rwabo, simbona akamaro ko kumara imyaka n’imyaka ngo barimo kwigana ingeso kuko zirahinduka buri gihe bitewe n’uburyo umuntu abayeho.

Byongeye, kumarana igihe kirekire bituma hashobora kuvamo kurambirwa hagati y’abakundana, ugasanga umusore cyangwa inkumi yarambiwe no kurindira igihe cyo kuzambikana impeta, bikava aho bitera gutandukana kandi nta kintu gifatika bapfuye.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo