Hari kwigwa uko COVID-19 yajya ipimwa hakoreshejwe ubwishingizi

Muri iki gihe imibare y’abandura icyorezo cya COVID-19 kimwe n’abo cyica ikomeje kwiyongera, Ikigo cy’Igihugu Gishinzwe Ubuzima, RBC, kirateganya ko kwipimisha iki cyorezo byakorana n’ubwishingizi mu kwivuza mu rwego rwo kugihashya burundu.

Ibi byatangajwe nyuma y’uko icyemezo cyo kuba warisuzumishije gitangiye kubazwa mu bikorwa bitandukanye hirya no hino mu gihugu, nk’imwe mu ngamba z’ingenzi mu gukumira ikwirakwira rya virusi mu baturage.

Kuri ubu abantu benshi bari kwipimisha kubera ko udafite icyemezo cy’uko utarwaye COVID-19, hari bimwe mu bikorwa atemererwa birimo ingendo zo mu ndege, kwitabira inama runaka, kujya mu mahoteli, kwitabira imikino n’ibindi.

Mu minsi ishize kandi Minisiteri y’Ubuzima iherutse kugaragaza ko ishyize imbaraga mu kwipimisha Coronavirus.

Ku wa 17 Ukuboza 2020 nibwo Minisiteri y’Ubuzima yahaye uburenganzira bwo gusuzuma COVID-19 ku mavuriro yigenga ari hirya no hino mu gihugu.

Hanatangijwe n’uburyo bwo gupima byihuse “antigens rapid tests” mu rwego rwo gupima abantu benshi kandi vuba.

Uretse amavuriro yigenga ariko RBC irateganya ko amavuriro ya Leta (ibigo nderabuzima cyangwa ibitaro by’akarere) mu gihugu hose agiye kwifashishwa mu gusuzuma. Biteganyijwe ko hazajya hakoreshwa uburyo bwo gupima byihuse.

RBC yatangaje ko gupimwa COVID-19 bizakorwa ku bwishingizi mu kwivuza butandukanye nk’uko igihugu gikomeje kubyigaho.

Umuyobozi wa RBC, Dr Sabin Nzanzimana, yabwiye The NewTimes ko ari ibintu bagiye gutangira kugerageza.

Yagize ati “Ntabwo ari ikintu duhita dukora, gusa biri muri gahunda zacu. Intambwe ikurikiyeho turifuza ko ibipimo byaba ari igice cy’ubwishingizi.”

Yongeyeho ko RBC itegereje ko inkingo zikorwa hirya no hino ku Isi, ariko ashimangira ko kwipimisha ari cyo cy’ingenzi ku Rwanda mu kubona ibisubizo.

Kugeza ubu amavuriro yigenga 42 mu gihugu hose ni yo yemerewe gukoresha ubu buryo bwo gupima “antigen rapid tests”, igiciro cyo kwipimisha kuri ubu ntikirenga 10 000 Frw.

Kugeza ku mugoroba wo kuri iki Cyumweru tariki ya 03 Mutarama 2021, mu Rwanda hamaze kwemezwa abantu 8,676 banduye COVID-19, muri bo 6,752 barayikize mu gihe 101 yabishe kuva igaragaye ku butaka bw’u Rwanda muri Werurwe 2020.


Hari gutekerezwa uko gupimwa COVID-19 mu Rwanda byakorerwa ku bwishingizi

IBIKUBIYE MU GITABO CYANDITSWE NA APOTRE MUTABAZI YISE "NKUGIRE INAMA MUYOBOZI":





Tanga igitekerezo kuri iyi nkuru



Igitekerezo