Hari abadakozwa ibyo gushyira udukingirizo mu mashuri

Kimwe na bamwe mu banyeshuri batemeranya na gahunda yo gushyira udukingirizo mu mashuri, hari na bamwe mu babyeyi batandukanye badakozwa iby’iyi gahunda bavuga ko ibi ari uburyo bwo gukurura ubusambanyi no kwigisha abana imico mibi. Nyamara ku rundi ruhande, hari abemeza ko ubu ari uburyo bwiza bwo kurinda abanyeshuri indwara zandurira mu mibonano mpuzabitsina no gukumira inda zitateganyijwe zikunze guterwa abangavu bakiri mu mashuri.

Umwe mu banyeshuri waganiriye na Umubavu utarashatse ko tuvuga amazina ye we abona iyi gahunda ikwiye nubwo ngo yakurura ubusambanyi. Mu magambo ye yagize ati “Ngewe mbona ari nk’uko baba bashaka kwigisha abana ibintu bijyanye n’ubusambanyi, igihe babibonye nyine nabo bajya barwana ishyaka ryo kubikoresha (Udukingirizo) kuko babibonye”

Yakomeje agira ati “Udukingirizo batuzanye nko mu kigo abanyeshuri urumva bajya bakurura ubusambanyi dore ko usanga abantu benshi baterwa inda bazitewe n’abasore baba hanze rero mbona udukingirizo twaba tudafite akamaro mu mashuri”.

Undi twaganiriye we abona iyi gahunda yakemura byinshi, yagize ati “ Birakwiye cyane kuko utwo dukingirizo batuzanye hari byinshi baba bakemuye kuko kuvuga ngo bakazanye ngo byatuma abanyeshuri barushaho ngo kugira uburara nk’ubwongubwo? Oya! Hari byinshi byaba bikemuye izo nda ziba zitateganyijwe zahagarikwa byacika kabisa”

Yakomeje agira ati “Hari icyo byadufasha, n’abanyeshuri ubwabo erega biraba cyane, ariko nkatwe twiga dutaha izo nda baziterwa n’abantu bo hanze.”

Yvette kandi yavuze ko icyo bifuza ari uko utu dukingirizo bajya batuzana mu mashuri bakabigisha no kudukoresha mu rwego rwo kubafasha kwikingira mu buryo bwiza.
Hari ababyeyi nabo badakozwa iyi gahunda bavuga ko ibi byakurura imico mibi mu banyeshuri ugasanga bibaviriyemo ibibazo bishobora no gutuma bamwe bareka amashuri yabo.

Kamariza Egidie (Amazina yahinduwe) we yabwiye Umubavu ko gushyira udukingirizo mu mashuri ari ukwigisha abana ubusambanyi bishobora kubabuza gukomeza amasomo yabo.

Mu kuboza 2017, Ubwo yari mu nama n’abayobozi bagize inzego zinyuranye mu Ntara y’Amajyaruguru, Musenyeri Servilien Nzakamwita, umushumba wa Diyosezi ya Byumba yavuze ko kumenyereza abana udukingirizo bituma birekura, bakishora mu busambanyi kuko baba beretswe ko mu gihe hari udukingirizo gusambana babyemerewe.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo