Covid 19 Imaze guhitana abarenga Miliyoni Eshatu

Ikigo cy’ubushakashatsi kuri virusi ya Corona muri kaminuza ya Johns Hopkins muri Leta zunze ubumwe z’Amerika, kiratangaza ko COVID-19 imaze guhitana abantu barenga miliyoni eshatu. Kuri uyu wa gatandatu, urubuga rw’iki kigo rwatangaje ko abamaze guhitanwa n’iki kiza bagera kuri 3,001,068.

Iyi ndwara ikomeje guhitana abatari bake mu gihe ibihugu binyuranye byo ku isi byatangiye gutanga inkingo zo kurwanya virusi iyitera. Nyamara mu bice bitandukanye, umubare w’abayandura ukomeje gutumbagira. Mu Buhinde, igihugu gisanzwe kizwiho gukora inkingo cyane kuri uyu wa gatandatu hagaragaye abarwayi bashya 230,000 mu gihe cy’amasaha 24 gusa.

Mu gihe Leta zunze ubumwe z’Amerika ikomeje gukingira abantu benshi iracyari ku isonga mu kugira umubare munini ku isi w’abanduye iyo ndwara. Ikigo cy’ubushakashatsi kuri virusi ya Corona muri kaminuza ya Johns Hopkins kiratangaza ko umubare w’abanduye COVID-19 muri Amerika ugera kuri miliyoni 31.5 muri miliyoni 140 z’abanduye iyo ndwara ku isi yose. Hakurikiraho Ubuhinde bufite miliyoni 14.5 z’abayanduye na Brazil ifite miliyoni 13.8 z’abanduye virusi ya Corona.

Umubare w’abandura ukomeje kwiyongera muri Canada watumye hashyirwaho ingamba zikaze zo kwirinda gukwirakwiza iyi ndwara. Mu ntara ya Ontario ubu hagiyeho itegeko ko uwanduye virusi ya Corona agomba kuguma mu rugo ibyumweru bitandatu byose. Mbere abantu basabwaga kwishyira mu kato ibyumweru bibiri gusa ariko ubu byongerewe.

Ishami ry’Umuryango w’Abibumbye ryita ku buzima (OMS) ryo ryagaragaje impungenge ko iyi ndwara ikomeje kwiyongera ku isi. Umuyobozi wa OMS Tedros Adhanom Ghebreyesus yatangaje ko abandura iyi ndwara bagenda biyongera buri cyumweru kandi bikubye kabiri mu mezi abiri ashize bityo imibare yabo ikaba isatira igipimo cyo hejuru kuruta ikindi gihe cyose kuva icyorezo cyatangira. Yavuze ko iyi mibare yatangiye kwiyongera mu kwezi kwa kabiri nyuma y’ibyumweru bitandatu byari bishize





Tanga igitekerezo kuri iyi nkuru



Igitekerezo