COVID-19 yishe abantu 2 mu Rwanda abandi 169 barayandura

Minisiteri y’Ubuzima ku Cyumweru tariki ya 10 Mutarama 2021, yatangaje ko abantu 2 bishwe n’icyorezo cya COVID-19 bituma umubare w’abamaze kwicwa n’iki cyorezo mu Rwanda ugera kuri 120 mu gihe abanduye na bo biyongereyeho 169 bakagera ku 9,630. Abantu 18 kandi ni bo bakize iki cyorezo mu masaha 24 ashize.

Aba bitabye Imana kuri uyu munsi, ni umugore w’imyaka 53 w’i Rusizi n’umugabo w’imyaka 81 wo mu Bugesera.

Itangazo rya Minisante ryerekana ko abarwayi 169 bakuwe I Kigali: 125, Musanze: 15, Rubavu: 11, Nyagatare: 6, Huye: 4, Rusizi: 3, Rulindo: 2, Nyanza: 1, Nyamasheke: 1, Bugesera: 1.

Umubare w’abamaze gukira Covid-19 bose mu Rwanda wabaye 6,974 nyuma yo gupimwa bagasangwa nta bwandu bagifite mu gihe 2,536 bakirwaye aho bakiri kwitabwaho.

Abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Ikigo gishinzwe gukurikirana indwara no kuzikumira muri Amerika(DCP), cyatangaje ko umuntu ashora guhabwa urukingo rwa Covid-19 akongera kwandura iyi ndwara kuko mu nkingo zose ziri kwifashishwa, nta ruyikingira 100%.

DCP yatangaje ko bitewe n’uko umuntu asabwa gufata inkingo ebyiri, bishobora gufata igihe kuko izi nkingo zibanza gufasha ubudahangarwa bw’umubiri kwitoza kurinda iyi ndwara by’umwihariko.

Urukingo rwa Moderna cyangwa Pfizer/BioNTech, nta na rumwe rwemejwe ko rushobora gukingira Covid-19 ijana ku ijana. Izi nkingo zombi nta rurengeje 95% kuko urwa Moderna rwo rukingira Covid-19 ku kigero cya 94.1%Ikigo cya DCP cyifashishije ibyavuye mu ikingirwa ry’umuganga witwa Sandra Lindsay wafashe urukingo rwa kabiri mu mpera z’Ukuboza 2020 ariko nyuma yapimwa bakamusangamo ubwandu bwa Coronavirus.

Ubusanzwe ku muntu wafashe urukingo rwa Covid-19 rwo mu bwoko bwa Pfizer/BioNTech, atangira kugira ubudahangarwa bw’umubiri nyuma y’iminsi irindwi afashe urwa kabiri. Ni mu gihe uwafashe urwa Moderna, umubiri we utangira kugira ubudahangarwa nyuma y’iminsi 14 afashe urwa Kabiri.

Ibi bisobanura ko umuntu wafashe urukingo aramutse ahuye n’uwanduye iyi ndwara mbere y’iminsi y’uko urukingo rutangira gukora, yahita yandura.

Kugeza ubu abantu bamaze kwandura Covid-19 ku isi barenga miliyoni 89.6. Muri abo, abagera kuri miliyoni 49.7 bamaze kuyikira, naho abagera kuri miliyoni 1.93 bamaze guhitanwa na yo.

YAVUYE MURI CONGO, IMANA YAMUHAYE UBUTUMWA UTAGOMBA GUCIKWA KANDI IMUTEGEKA KUBUNYUZA K’UMUBAVU TV ONLINE:





Tanga igitekerezo kuri iyi nkuru



Igitekerezo