Rusizi: Abanyamuryango ba Koperative ikusanya umusaruro w’umuceri baratabaza

Koperative ikusanya umusaruro w’abahinzi KOIMUNYA ikorera mu murenge wa Nyakabuye, Akarere ka Rusizi mu ntara y’iburengerazuba,ikaba igizwe n’abanyamuryango bakabakaba ibihumbi bibiri.

Muri ino minsi abanyamuryango bayo bababajwe nuko umutungo wabo uri gucungwa nabi kandi ibi bakaba barakomeje kubibwira inzego zimwe na zimwe ntizibyumve ngo zibikemure.

Hari abanyamuryango bamwe na bamwe bavuganye n’umunyamakuru w’umubavu.com maze bamutekerereza ibibazo bafite kugira ngo babakorere ubuvugizi.

Umwe utashatse ko amazina ye atangazwa yabwiye umubavu.com ko bahangayikishijwe n’icungwa ribi ry’umutungo wabo kandi barebera.

Yagize ati "Umutungo wa Koperative urarigiswa abantu barebera wagira ngo Koperative yabaye iy’abantu nka bane, ibyo bintu rero ntidushobora kubyemera na gato".

Yakomeje avuga uburyo umugabane shingiro wabo wakoreshejwe kandi nta hame na rimwe ribemerera gukoresha amafaranga kugeza naho bakoresha amafaranga y’umugabane shingiro w’abahinzi.

Ubwo iyi nkuru yakorwaga umunyamakuru yasanze Bwana Harerimana Emmanuel, Perezida wa Koperative KOIMUNYA ikusanya umusaruro w’abahinzi b’umuceri amubaza kuri iki kibazo maze amusubiza amubwira ko koko ayo mafaranga y’imigabane yakuwe kuri Konte (Compte) maze agakoreshwa kandi icyo yakoreshejwe ngo kikaba kigaragara.

Yagize ati "Twabonye ubukode buturembeje maze inama yanzura ko ayo mafaranga akurwa kuri Compte maze tukubaka inzu ya Koperative maze tukabona aho gukorera hacu kandi hadakodeshwa.

Ni muri ubwo buryo twubatse iyi nzu ureba maze tuva muri Kode twakodeshaga amafaranga atari make ku kwezi.

Umunyamakuru yamubajije uburyo umunyamuryango yabona umugabane we mu gihe byaba bibaye ngombwa ko Koperative isenyuka, maze asubiza ko habaho kugurisha umutungo wa Koperative.

Gusa umuntu yavuga ko gufata amafaranga y’umugabane shingiro w’umunyamuryango agakoreshwa ari agashya n’umwihariko umunyamakuru yasanzwe muri iyi Koperative.

Undi munyamuryango utashatse ko amazina ye atangazwa ku bw’umutekano we nawe yabwiye umubavu.com ko imyaka ibaye myinshi iyi Koperative ntacyo ibamariye.
Yagize ati "Imyaka ibaye myinshi ngo tuba muri Koperative ariko nta byiza byayo wabona. Hakize abayiyobora, barubatse amazu reka reka sinakubwira".

Umunyamakuru kandi yabajije Perezida wa Koperative Bwana Harerimana Emmanuel iby’icyo kibazo maze avuga ko nyamara Koperative ifatiye runini abanyamuryango bayo kuko ngo nk’ubu bari kuguriza ababyeyi amafaranga abana bajyana mu mashuri kandi nta nyungu, ayo mafaranga akazishyurwa ku musaruro.

Yanavuze ko kandi boroza bamwe mu banyamuryango amatungo magufi mu rwego rwo kwiteza imbere.

Hanagarutswe kandi ku kibazo cy’amafaranga yatswe buri munyamuryango angana n’ibihumbi cumi na bine kugira ngo hagurwemo imodoka irajya itwara umusaruro ikaba itaraguzwe.

Umunyamuryango yavuze ko kuba itaraguzwe harimo itekinika kuko hari n’abantu bane bagiye i Kigali kurambagiza imodoka ibintu umuntu nabwo yakwibaza bikamuyobera, ukibaza niba Koperative nk’iriya itagira akanama gashinzwe amasoko.

Imisanzu yaratanzwe n’abanyamuryango bose ariko imodoka ntiragurwa, nyamara bamwe mu banyamuryango babwiye umubavu.com ko ushobora no gusanga ayo mafaranga yarakoreshejwe kera bakaba bababeshya.

Yagize ati "Nta wamenya ibya bariya bagabo wanasanga amafaranga yarariwe kera, ni uko bakora".

Ikibazo cy’iyi modoka kimaze kuba agatereranzamba dore ko cyanateje urunturuntu mu bahinzi.

Nabajije kandi Perezida wa Koperative kuri iki kibazo, maze avuga ko imodoka bageze ku isoko bagasanga ihenze maze bakaba bayiretse.

Yabwiye umunyamakuru ko bakusanyije Miliyoni makumyabiri n’eshanu (25,000,000 Frw) bagasanga igura Miliyoni mirongo itanu.

Kugeza ubu abahinzi ntibavuga rumwe n’ubuyobozi b’iyi Koperative ku mafaranga yabo yatanzwe kera akaba ntacyo ari gukora bitewe no kwiga uyu mushinga nabi wo kugura imodoka amafaranga akaba makeya ku yari akenewe ngo igurwe.

Umunyamakuru yamubajije kandi aho ayo mafaranga yiyongeraho azava ngo imodoka igurwe, maze avuga ko ari ibyo bazarebera hamwe.

Ubundi akanama gatanga amasoko kagomba kubaho muri Koperative yose kugira ngo hirindwe ruswa n’ikimenyane ariko kuri bo si ko bimeze.

Abanyamuryango kandi baratunga agatoki umuyobozi w’iyi Koperative mu kurigisa nkana umutungo wayo ariko we akavuga ko hari abamukuriye bakarebye ko koko ibyo afite aho ahuriye nabyo.

Ahakana ibi kandi yivuye inyuma avuga ko ntaho ahuriye na byo ahubwo akavuga ko kuva yagera muri iyi Koperative aribwo bageze ku musaruro uhagije nkuko imibare ibyerekana.

Hashize iminsi ikigo cy’igihugu gishinzwe amakoperative (Rwanda Cooperative Agency, RCA) gitangiye gahunda y’igenzura mu makoperative kugira ngo hamenyekane abagize uruhare mu kurigisa amafaranga y’abanyamuryango.

PNG - 566.7 kb
Iyi ni Liste igaragaza uko umusaruro wagiye wiyongera buri mwaka
PNG - 529.6 kb
Uyu ni Bwana Harerimana Emmanuel, Perezida wa Koperative KOIMUNYA ikusanya umusaruro w’abahinzi b’umuceri

Denis Fabrice Nsengumuremyi

@Umubavu.com





Tanga igitekerezo kuri iyi nkuru



Igitekerezo