Cyamunara y’imitungo yo kwa Rwigara yatindijwe n’imyenda bafitiye amwe mu mabanki-RRA

Ikigo cy’Igihugu gishinzwe Imisoro n’Amahoro (RRA), giherutse gutangaza ko nyuma y’ukwezi k’Ugushyingo 2017, kizatangira guteza cyamunara imitungo y’umuryango wa Rwigara Assinapol, mu gihe waba udatangiye kwishyura ibirarane by’imisoro ubereyemo Leta.

Iki kigo gitangaza ko uyu muryango wa Rwigara urimo ibirarane by’imisoro bya miliyari esheshatu z’amafaranga y’u Rwanda byo guhera mu mwaka wa 2012, akomoka ku ruganda rwawo rukora itabi ‘Premier Tobacco Company.’

RRA itangaza ko yaganiriye n’uyu muryango ukerekwa ko ufite uburenganzira bwo kwishyura uyu mwenda mu byiciro, ugakomeza imirimo y’uruganda ariko ukabyanga.

Gusa amakuru ahari ni uko uyu muryango wareze iki kigo mu rukiko rw’ubucuruzi, ugishinja gufatira bimwe mu bikoresho na konti z’uruganda bigatuma rumaze amezi arindwi rudakora.

Mu kiganiro n’abanyamakuru cyo kuri uyu wa Gatatu, Komiseri Mukuru wa RRA, Tusabe Richard, yabajijwe impamvu bataratangira guteza cyamunara imitungo yo kwa Rwigara nk’uko babivuze nyamara uyu muryango ntacyo wubahirije kigaragara ko cyatambamira icyamunara.

Tusabe yasobanuye ko kuba umuryango wa Rwigara hari abandi bantu benshi cyane cyane amabanki bawishyuza imyenda ubafitiye, akaba ari imwe mu mpamvu yatindije icyamunara.

Yagize ati “Icyabitindije ni amategeko, hari ibigomba kubahirizwa. Ba nyiri Premier Tobacco Company, bafitiye imyenda abantu benshi cyane cyane amabanki. Ayo mabanki hari amafaranga abishyuza kuko naho bakoze ubuhemu bwo kutishyura ku gihe, na bo bakaba bashaka gutangiza inzira yo guteza cyamunara.”

PNG - 823.9 kb
Komiseri Mukuru wa RRA, Tusabe Richard avuga ko imyenda y’amabanki yazanye ihurizo muri cyamunara y’imitungo yo kwa Rwigara.


Yakomeje avuga ko RRA n’ayo mabanki bagomba kugena agaciro k’imitungo izatezwa cyamunara nk’uko amategeko abiteganya, ibi ngo bikaba bitazarenza ukwezi kwa kabiri bitarangiye ngo hatangazwe icyamunara.

Ati “Icyo nakwizeza ni uko uku kwezi kwa kabiri turakorana n’abandi bantu bafitiye amafaranga kugira ngo dushobore kureba ko bagaruza amafaranga babafitiye, natwe tugaruze amafaranga bafitiye Leta.”

Icyakora Ikigo cy’igihugu gishinzwe imisoro n’amahoro kivuga ko mbere yo gutanga itangazo rya cyamunara umuryango wa Rwigara ufite uburenganzira bwo kwishyura.

Ntabwo twafunze uruganda

Mu rubanza abo mu muryango wa Rwigara barezemo RRA, mu rukiko rw’ubucuruzi rwa Nyarugenge, bavuze ko iki kigo cyatwaye mudasobwa z’uruganda ndetse n’ibitabo by’ubucuruzi bigatuma imirimo idakomeza.

Bavuga kandi ko konti z’urwo ruganda ziri muri Equity Bank na Ecobank zafatiriwe ndetse ububiko bw’ibicuruzwa n’ibikoresho byifashishwa mu gukora itabi bwafunzwe, aho RRA yashyizeho ingufuri ndetse uruganda rugahabwa n’abarinzi bashya.

Tusabe yasobanuye ko uruganda rutigeze rufungwa ahubwo icyo basabye ari uko rukomeza gukora ariko RRA igafatanya na ba nyirarwo kurucunga, kugira ngo ibyagurishijwe bivemo ubwishyu bw’umwenda. Gusa ngo abo kwa Rwigara ntibabyemeye bityo bahitamo guhagarika imirimo y’uruganda ku bushake.

Ati “Ni ubushake bwabo kuba barahagaritse ibikorwa n’uyu munsi bashatse gusubukura ibikorwa bakora ariko amafaranga bacuruza akagira icyo ajya kugabanya kuri wa mwenda. Bitabujije ko twakumvikana amafaranga basigarana kugira ngo uruganda rukomeze gukora, ariko natwe hari icyo dukuramo kugira ngo umwenda ugabanuke.”

Akomeza agira ati “Ntabwo twafunze uruganda, nta nyungu dufite yo gufunga uruganda kuko natwe icyo dushinzwe ni uguteza imbere ubucuruzi kugira ngo dukomeze kubona amafaranga y’imisoro n’amahoro.”

Itegeko rigenga imitunganyirize y’isoresha riteganya ko umusoreshwa ashobora gusaba Komiseri Mukuru kwishyura mu byiciro ibirarane by’imisoro, ariko ntibishobora kurenza umwaka umwe.

Iyo umusoreshwa atishyuye nk’uko yabyiyemeje mu masezerano, asabwa guhita yishyurira rimwe amafaranga yose yari asigaye.

Rinagena ko iyo umusoreshwa atabashije kwishyura, Ikigo cy’Imisoro gishobora gufatira umutungo we ndetse ibyafatiriwe bigatezwa cyamunara nyuma y’iminsi umunani umusoreshwa amenyeshejwe inyandikomvugo y’ifatira.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo