Umusirikare uregwa gukorana na RNC yajyanwe kwa muganga igitaraganya biba inzitizi mu rubanza

Uko ari 25 baregwa gukorana n’imitwe y’iterabwoba mu guhungabanya umutekano w’u Rwanda, bari kuburanira mu Rukiko rwa gisirikare ruri i Nyamirambo mu Mujyi wa Kigali. Baregwa ibyaha bine birimo kwinjira mu mutwe w’ingabo utemewe; kugambirira kugirira nabi ubutegetsi buriho; kugirana umubano na Leta y’amahanga bigiriwe gushoza intambara no kurema umutwe w’abagizi ba nabi.

Barangajwe imbere na (Rtd) Major Habib Mudathiru wari umuyobozi ushinzwe ibikorwa n’imyitozo mu gisirikare cya P5, cyubakiye ku mashyaka atanu ari yo Amahoro People’s Congress, Forces Démocratiques Unifieés – Inkingi (FDU-Inkingi); People’s Defence Pact-Imanzi (PDP-Imanzi), Rwanda National Congress (RNC) na PS Imberakuri. Bose ngo bakuriwe na Kayumba Nyamwasa.

Bitandukanye n’ubushize, kuri iyi nshuro bageze mu rukiko bambaye impuzankano y’imfungwa za gisirikare, mu gihe ku nshuro zabanje bageraga imbere y’umucamanza bambaye imyenda isanzwe.

Haje kuboneka ikibazo cya Me Butera Dismas wagombaga kunganira Abarundi batatu, Nsabimana Jean Marie Vianney, Nsengiyumva Janvier na Ndikurugendo Issa, utabonetse mu rukiko kandi ntatange impamvu ye. Abo yagombaga kunganira banabwiye urukiko ko batigeze bahura na we.

Umushinjacyaha yahise avuga ko uretse abo, hari undi uregwa witwa Habyarimana Joseph warwaye mu nda bitunguranye, ku buryo yajyanwe kwa muganga mu gihe abandi bajyanwaga mu rukiko.
Yavuze ko mu bijyanye n’abatabonye umwavoka, ari ubureganzira bahabwa n’itegeko kwemererwa igihe cyo kumuhabwa, bityo urubanza rushobora gusubikwa, rukazasubukurwa yabonetse ndetse n’urwaye akaba ahari.

Gusa abanyamategeko basabye ko kubera ko urubanza rutaba mu munsi umwe n’ubundi, haburana abunganiwe abandi bakazakomerezwaho ubutaha.

Umucamanza Lt Col Charles Madudu uyoboye iburanisha yahise ashyigikira uwo mwanzuro, avuga ko haburana abiteguye kuko abavoka bagaragaje ko kongera gusubika uru rubanza byatuma rufata igihe kirekire kurushaho.

Umusirikare yabaye inzitizi mu rukiko

Umwavoka wa Rtd Major Mudathiru, Me Umulisa Paola, yateruye avuga ko umukiliya we yasezerewe mu Ngabo z’u Rwanda, bityo hari inzitizi zo kuba yarajyanwe mu rukiko rwa gisirikare kandi yarabaye umusivili, akibaza uburyo abasivili bajyanwa mu rukiko rwa gisirikare.

Umushinjacyaha yahise asubiza ko nubwo ari abasivili, barezwe ibyaha bifitanye isano n’urubanza ruregwamo umusirikare Pte Muhire Dieudoné na bagenzi be batanu ruri mu rukiko rukuru rwa Gisirikare. Izi manza zombi ngo zizahuzwa, ari nayo mpamvu aba barimo kuburana ku ifungwa n’ifungurwa na bo baregewe urukiko rwa gisirikare.

Abanyamategeko ntibanyuzwe, bahuriza ku kuba igihe cyose izo dosiye zitarahuzwa, abaregwa bakwiye kuburanira mu rukiko rwa gisivile. Ikindi ngo ni uko itegeko rigena ububasha bw’inkiko riteganya ko imanza zidahuje kamere cyangwa zitari ku rwego rumwe rw’iburanisha, zidashobora guhuzwa.

Bityo ngo izo dosiye zombi ntiziri ku rwego rumwe kuko Pte Muhire na bagenzi be bamaze kuregerwa Urukiko rukuru rwa Gisirikare bategereje kuburana mu mizi, mu gihe Rtd Major Mudathiru na bagenzi be bakiburana ifungwa n’ifungurwa ry’agateganyo.

Umushinjacyaha yavuze ko igitekerezo cyo guhuza dosiye gishingiye ku mpamvu z’amategeko kuko ibyaha baregwa byabereye igihe kimwe n’ahantu hamwe. Yavuze ko Pte Muhire ngo yagiye muri Uganda mu 2017 gushaka abarwanyi ba RNC, mu gihe Mudathiru yumvikanaga na Capt Sibo Charles wa RNC, ku mikoranire mu gisirikare cya P5.

Gusa umunyamategeko yavuze ko isobekerana ry’imanza ryemezwa n’icyemezo cya Perezida w’urukiko, kandi ngo ntacyo babonye muri dosiye, ngo si umushinjacyaha wemeza ko dosiye zisobekeranye.

Me Rwagasore Jean Claude yongeyeho ko guhuza imanza bikozwe n’Ubushinjacyaha byari gukorwa ari bwo bugifite dosiye zombi, ariko ngo aho zigeze byakwemezwa na Perezida w’urukiko rukuru, ku buryo Pte Muhire na bagenzi be baburanishwa ukwabo, abandi bakaburanishwa ukwabo mu rukiko rutari urwa gisirikare.

Abanyamategeko bagaragaza ko guhuza izi dosiye atari ngombwa, cyane ko abaregwa ibi byaha bari muri RDC bashobora gukomeza gufatwa ndetse bakoherezwa mu Rwanda, ku buryo buri gihe bitajya bisaba ko urubanza ruhagarikwa ngo dosiye zihuzwe.

Major Mudathiru yahawe umwanya avuga ko abo bandi bashobora guhuzwa mu rubanza atabazi, ku buryo ngo afite impungenge ko bashobora no kuzamuhuza na FDLR atazi.

Yavuze ko we n’abo yari ayoboye bari mu mutwe wa P5, ku buryo yumva yaburanishwa ku byaha "nzi nemera, ariko batampekesheje uwo ntigeze mbyara".

Umucamanza Lt Col Charles Madudu yahise avuga ko urukiko rugiye gufata umwanya, rukareba niba rufite ububasha bwo kuburanisha aba basivili baregewe urukiko rwa gisirikare. Umwanzuro w’urukiko ugatangazwa saa munani.

Nyuma yo kwiherera, umucamanza yanzuye ko Urukiko rwa Gisirikare rufite ububasha bwo kuburanisha abaregwa, ku buryo inzitizi zitangwa n’ababunganira mu mategeko zidafite ishingiro.

Ibisabwa n’aba banyamategeko bihura n’uburyo abantu batandukanye bagiye baregwa ibyaha bakoze mu mitwe yitwaye gisirikare nka Callixte Nsabimana wiyise Sankara wari umuvugizi wa FLN; Nkaka Ignace alias La Forge Bazeye Fils wari umuvugizi wa FDLR na Nsekanabo Jean Pierre Alias Abega wari ushinzwe iperereza muri uwo mutwe, bari kuburanira mu nkiko za gisivili.

Gusa iyo mu bo bareganwa habamo umusirikare ukiri mu kazi, nta mpaka zari kubaho ku mpamvu bajyanwe muri uru rukiko.

Kimwe n’inshuro zabanje, Mudathiru kuri uyu wa Mbere yagenderaga ku mbago, ndetse ukuguru kumwe gufunzwe n’ibyuma kubera amasasu yarashwe n’ingabo za RDC ubwo yafatwaga, ku buryo no mu cyumba cy’urukiko aba yahawe intebe iriho umusego akurambikaho.

Abafashwe bose bakuwe mu mashyamba ya Congo nyuma y’igico gikomeye batezwe n’ingabo z’icyo gihugu, FARDC, aho mu iburanisha abenshi bahurije ku kuvuga ko bashyikirijwe u Rwanda ku wa 18 Kamena 2019.

JPEG - 267.4 kb
Photo by Emmanuel Kwizera

Source igihe





Tanga igitekerezo kuri iyi nkuru



Igitekerezo