Uganda: Abasirikare batobye ibikorwa by’Inteko y’Abadepite

Umuyobozi w’Inteko Nshingamategeko ya Uganda, Rebecca Kadaga yasabye ko hakorwa iperereza ku bivugwa ko Abasirikare baba barinjiye mu ngoro y’Inteko Nsingamategeko ubwo Abadepite barimo bungurana ibitekerezo ku ngingo ivuga ku myaka uwiyamamariza kuyobora igihugu agomba kuba yujuje.

Ibyo bikorwa byahagaritswe by’agateganyo nyuma yaho bamwe mu badepite bagaragaje ko bafite impungenge ku bijyanye n’umutekano wabo nkuko BBC dukesha iyi nkuru babyanditse..

Aba badepite barimo bamaganira kure itegeko ryatuma Perezida Yoweri Kaguta Museveni asubira ku butegetsi ku nshuro ya gatandatu.

Leta ya Uganda ivuga ko hari Abapolisi mu ngoro y’Inteko Nsingamategeko mu gihe hari abavuga ko hari n’abasirikare ariko Leta ikabihakana yivuye inyuma.

Umuyobozi w’Inteko Nsingamategeko, Rebecca Kadaga, yavuze ko atakwirengagiza impungenge zigaragazwa n’Abadepite anahita asaba ko hakorwa iperereza.

Yongeyeho ko ibiganiro byo guhindura Itegeko Nsinga bikomeza kuri uyu wa kabiri tariki ya 20 Ukuboza 2017.

Mu kwezi kwa cyenda, Abasirikare bambaye impuzankano ya gisirikari binjiye mu ngoro y’Inteko Nshingamategeko bakubita banafata bamwe mu badepite, ibi bikaba byarababaje abaturage ba Uganda benshi.

Kuri ubu, Abapolisi n’Abasirikare nibo bari iruhande y’ingoro y’Inteko Nshingamategeko no mu mugi wose.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo