U Burundi: Impinduka muri Guverinoma zisize bamwe mu bayobozi bari bakomeye beretswe imiryango

Kuri uyu wa Kane tariki ya 19 Mata 2018, nibwo Perezida w’u Burundi Pierre Nkurunziza yavuguruye Guverinoma y’iki gihugu yereka umuryango bamwe mu bari bakomeye muri iyi Guverinoma barimo umuvandimwe wa Willy Nyamitwe, Alain Aime Nyamitwe n’abandi nka Nestor Bankumukunzi, Dr Josiane Nijimbere na Celestin Ndayizeye.

Abantu bashya binjijwe muri Guverinoma barimo Ezechiel Nibigira, wahoze ari umukuru w’Imbonerakure, Gaspard Banyankimbona, wahoze ari umuyobozi wa Kaminuza y’u Burundi, Evelyne Butoyi, wari umusenateri, Thaddee Ndikumana, wahoze ari umuvugizi wa Minisiteri y’Ubuzima na Jean-Marie Niyokindi.

Muri iyi Guverinoma nshya y’u Burundi, uyu Ezechiel Nibigira wahoze ari umukuru w’Imbonerakure niwe wasimbuye Alain Nyamitwe ku mwanya wa Minisitiri w’Ububanyi n’Amahanga, Alain Guillaume Bunyoni aguma ku mwanya wa Minisitiri w’umutekano ndetse Emmanuel Ntahomvukiye nawe akomeza kuba Minisitiri w’ingabo.

Gaspard Banyankimbona yagizwe Minisitiri w’amashuri makuru n’ubushakashatsi, Thaddee Ndikumana agirwa minisitiri w’ubuzima, Evelyne Butoyi agirwa Minisitiri w’Urubyiruko, amaposita n’ikoranabuhanga mu isakazamakuru, naho Jean-Marie Niyonkindi agirwa minisitiri w’ubucuruzi n’inganda n’ubukerarugendo.

Izi mpinduka muri Guverinoma y’u Burundi zikaba zikozwe mu gihe habura iminsi ibarirwa ku ntoki ngo Abarundi binjire mu matora ya Referandumu agamije guhindura itegeko nshinga ry’u Burundi abatavuga rumwe n’ubutegetsi bavuga ko igamije kugumisha Perezida Nkurunziza ku butegetsi ubuziraherezo.

Iyi Guverinoma ikaba igizwe n’Abaminisitiri bagera kuri 21.

PNG - 740 kb
Uyu ni Alain Nyamitwe wari Minisitiri w’Ububanyi n’Amahanga wasimbujwe Ezechiel Nibigira wahoze ari umukuru w’Imbonerakure

@Umubavu.com





Tanga igitekerezo kuri iyi nkuru



Igitekerezo
Mugande john Kuya 21-04-2018

aha nomwijuru ryarahabaye kandnubutegetsisumurange wokuzasaziraho nguwuragabuzukuruza