Tanzaniya: Abatutse Perezida Magufuli barimo n’Umudepite bakatiwe gufungwa

Abagabo babiri barimo n’umudepite batavuga rumwe na Leta ya Tanzania iyobowe na Perezida John Pombe Magufuli bakatiwe gufungwa amezi atanu umwe umwe, nyuma yuko bahamwe n’icyaha cyo gutuka umukuru w’igihugu.

Aba bagabo batawe muri yombi, barimo Joseph Mbilinyi usanzwe ari Umudepite wo mu ishyaka rya Chadema ritavuga rumwe n’ubutegetsi bwa CCM (Chama Cha Mapinduzi) riri ku butegetsi ari naryo riyobowe na Perezida John Pombe Magufuli.na Emmanuel Masonga bashinjwaga gukoresha imvugo irimo gutuka umukuru w’igihugu Bwana Magufuli mu ruhame mu kwezi kwa 12 k’umwaka ushize wa 2017.

Kuri uyu wa Mbere tariki 26 Gashyantare 2018, nibwo uhagarariye urukiko yavuze ko uyu Mbilinyi uregwa ibyaha bimwe na Emmanuel Masonga bakoreye mu ishuri ribanza rya Mwenge Primary School aho bivugwa ko batanzemo ubutumwa bubiba urwango mu baturage bukangisha abaturage ubuyobozi ndetse bukabiba amacakubiri ku wa 30 Ukuboza 2017.

Ikinyamakuru Tuko cyanditse iyi nkuru kivuga ko inyandiko ziriho ibirego aba bagabo bashinjwa zigaragaraho uburyo bibasiye Perezida Magufuli n’uburyo akoresha ngo akundwe n’abaturage aho uyu mudepite na mugenzi we babwiye abanyeshuri n’abandi bari baje gutega amatwi ubutumwa bwabo ko Magufuli adashobora kubwira abantu ngo bamukunde kandi ari umwicanyi yirirwa anafunga abantu abaziza ubusa.

PNG - 669.2 kb
Joseph Mbilinyi usanzwe ari Umudepite wo mu ishyaka rya Chadema ritavuga rumwe n’ubutegetsi bwa Tanzaniya


Mu bo uyu mudepite yavugiye muri iri shuri Perezida Magufuli yafunze harimo uwitwa Lema uherutse gukatirwa amezi ane, hari kandi n’Umwe mu batavuga rumwe n’ubutegetsi bwa Magufuli witwa Tundu Lissu uherutse kuraswa nabyo uyu mudepite yabihuje na Magufuli avuga ko yabigizemo uruhare.

Umwitwarariko utangiye kwiyongera muri Tanzania kubera kutihanganira ababona ibintu mu buryo budasa n’ubw’abari ku butegetsi.

Mu cyumweru gishize, abahagarariye ibihugu byabo cyane cyane by’I Burayi, bavuze ko ibiri kuba muri iki gihe muri Tanzania bibangamiye inkingi za demokrasi mu gihugu.
Abatavuga rumwe na Leta bavuga ko hari abantu bishwe muri iyo minsi ishize bahowe impamvu za politike.

PNG - 852.2 kb
Hari umwitwarariko muri Tanzania kubera kutihanganira abanenga ubutegetsi

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo