Ruhango: Polisi yafashe Umucungamutungo w’Iposita ukekwaho kunyereza umutungo w’icyo kigo

Polisi mu karere ka Ruhango yafashe Mwerekande Alain Gilbert, umugabo w’imyaka 31 y’amavuko wari umucungamutungo w’Iposita mu karere ka Ruhango, ukekwaho kunyereza umutungo yari ashinzwe gucunga.

Uyu mugabo afungiwe kuri Sitasiyo ya Ruhango kuva ku wa 30 Gicurasi aho akurikiranyweho kunyereza asaga Miliyoni eshatu n’ibihumbi Magana atanu by’ amafaranga y’ u Rwanda ( 3 500 000 frw)

Umuvugizi wa Polisi mu Ntara y’ Amajyepfo, Chief Inspector of Police (CIP) Emmanuel Kayigi yavuze ko bahawe amakuru ko umucungamutungo w’icyigo gishinzwe itumanaho ( IPOSITA) mu karere ka Ruhango yakoresheje nabi umutungo ashinzwe kurinda.

Yagize ati,"Twamenye ko ubugenzuzi bw’imari ya Leta bwasanze umucungamutungo w’Iposita ya Ruhango yarakoresheje nabi umutungo w’Ikigo; aho amwe mu mafaranga hatagaragaraga icyo yakoze, ahandi ugasanga umutungo w’Ikigo warakoreshejwe mu nyungu ze bwite; ni ko guhita tumufata ngo ashyikirizwe ubugenzacyaha."

Yaboneyeho gusaba abakora imirimo yo gucunga umutungo w’abaturage gucunga neza ibyo bashinzwe kurinda agira ati,"Si byiza kuba waragiriwe icyizere cyo gucunga iby’abandi ngo ugitakaze. Birakwiye ko unyurwa n’ibyo amategeko akugenera birimo n’umushahara, kuko iyo ushatse gukizwa n’iby’abandi bihinduka icyaha gihanwa n’amategeko."

CIP Kayigi asoza yasabye abaturage gutangira amakuru ku gihe ku bigo byaba bivugwamo imicungire mibi kugira ngo Polisi ikumire ibyaha nk’ibi amazi atararenga inkombe.

Yagize ati, "Igihe umenye ko hari ikigo kivugwamo abakozi bafite umuco wo gucunga nabi ibya rubanda,ntukwiye kubihishira; hita umenyesha inzego z’umutekano turwanye ibyaha nk’ibi kuko bimunga ubukungu bw’igihugu, iterambere twifuza rikadindira."

Yasabye abaturage gucika ku muco mubi wo gutunga ibyo batakoreye kuko ari icyaha gihanwa n’amategeko y’u Rwanda.

Ingingo ya 325 y’Igitabo cy’Amategeko ahana ibyaha mu Rwanda iteganya ko umuntu wese urigisa umutungo, amafaranga, impapuro zivunjwa amafaranga, ibyemezo by’imari n’inyandiko bya Leta cyangwa bitari ibya Leta cyangwa ibintu byimukanwa by’undi yabikijwe ku bw’umurimo ashinzwe;ahanishwa igifungo kuva ku myaka irindwi (7) kugeza ku myaka icumi (10) n’ihazabu y’amafaranga yikubye inshuro kuva kuri ebyiri (2) kugeza kuri eshanu (5) z’agaciro k’umutungo warigishijwe cyangwa wononwe.





Tanga igitekerezo kuri iyi nkuru



Igitekerezo