Rubavu: Polisi yafashe uwinjizaga urumogi mu gihugu aruhishe mu nkweto yari yambaye

Ahagana saa cyenda z’igicamunsi cyo ku wa gatatu tariki 30 z’uku kwezi, Polisi mu karere ka Rubavu yafatanye uwitwa Ngirabanzi Amini udupfunyika tw’urumogi 104 arimo kurwinjiza mu gihugu aruhishe mu nkweto yari yambaye.

Uyu musore w’imyaka 24 y’amavuko yafatiwe mu kagari ka Mbugangari, mu murenge wa Gisenyi; akaba yarafashwe arimo guturuka muri Repubulika Iharanira Demokarasi ya Kongo.

Ku byerekeye uburyo yafashwe, Umuvugizi wa Polisi mu Ntara y’Iburengerazuba, Chief Inspector of Police (CIP) Innocent Gasasira yabisobanuye agira ati,"Abapolisi bakorera ku mupaka muto uhuza U Rwanda na kiriya Gihugu; aho bita kuri Petite Barrière; babonye amakuru ko Ngirabanzi ashobora kuba ari umwe mu binjiza ibiyobyabwenge mu Gihugu. Ubwo yageraga kuri iriya bariyeri; abo bapolisi baramusatse, basanga mu nkweto yari yambaye yahishemo utwo dupfunyika ntw’urumogi; iramufata, imushyikiriza Urwego rw’Igihugu rw’Uugenzacyaha (RIB)."

Ku bijyanye n’amayeri yakoresheje kugira ngo yinjize urumogi mu gihugu, CIP Gasasira yabivuzeho agira ati,"Rumwe yari yarushyize munsi ya Tapi y’inkweto yari yambaye; urundi yari arwambariyeho amasogisi; ariko n’ubwo yabigenje atyo; ntibyabujije Polisi gutahura ayo mayeri."

Uyu musore wafatanywe utu dupfunyika 104 tw’urumoi aje akurikira abandi na none bahafatiwe bafite ibiyobyabwenge; mu bahafatiwe hakaba harimo abari bahishe urumogi mu mapine y’igare, mu bihaza, mu migati, mu majerekani arimo amata; abarwambariyeho imyenda; hakaba ndetse n’abafashwe barwambariyeho ingofero.

Yagize ati,"Polisi y’u Rwanda izi amayeri y’abishora mu biyobyabwenge; baba ababyinjiza mu gihugu, ababitunda, ababicuruza, ababinywa, ndetse n’ababikoresha. Ababikora baragirwa inama yo kubireka bagakora ibindi byemewe n’amategeko bibateza imbere; bikanateza imbere igihugu."

CIP Gasasira yavuze ko kwishora mu biyobyabwenge bigira ingaruka zirimo igifungo, gucibwa ihazabu; no kuba umuntu ubinywa arwara indwara zitandukanye; akaba kandi akora ibyaha birimo gukubita no gukomeretsa, gufata ku ngufu, gusambanya abana n’ihohotera rishingiye ku gitsina; maze asaba abatuye Intara y’Iburengerazuba kubyirinda no gutanga amakuru ku gihe yerekeye ababyishoramo.

Yagize kandi ati,"Abashyira imbere inyungu bakura mu gucuruza urumogi cyangwa ibindi biyobyabwenge ndetse n’inzoga zitemewe mu Rwanda; zaba izo mu masashi cyangwa insukano nka Kanyanga bamenye ko inzego za Leta zahagurukiye kurwanya ubwo bucuruzi bushyira mu kaga ubuzima bw’abantu bukanadindiza iterambere ry’Igihugu. Ababikora bakwiriye kubihagarika."

Yibukije ko urumogi rufatwa nk’ikiyobyabwenge mu Rwanda hashingiwe ku biteganywa n’Iteka rya Minisitiri w’Ubuzima Nº 20/35 ryo ku wa 09/6/2015 rigena ibinyobwa bitemewe n’ibindi bintu bicungwa kandi bifatwa nk’ibiyobyabwenge n’urusobe rw’imiti ikoreshwa nka byo.

Gukora, guhindura, kwinjiza no kugurisha mu gihugu ibiyobyabwenge n’urusobe rw’imiti ikoreshwa nka byo mu buryo bunyuranije n’amategeko, ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000) nk’uko biteganywa n’ingingo ya 594 y’Igitabo cy’Amategeko ahana ibyaha mu Rwanda.





Tanga igitekerezo kuri iyi nkuru



Igitekerezo