RIB yahamagaje Victoire Ingabire ngo atange amakuru ajyanye n’urupfu rwa Dusabumuremyi

Urwego rushinzwe Ubugenzacyaha (RIB), rwatangaje ko rwakiriye Umuyobozi w’ishyaka ritavuga rumwe n’ubutegetsi FDU-Inkingi, Ingabire Victoire Umuhoza, ku wa 01 Ukwakira 2019 kugira atange amakuru yafasha mu iperereza riri gukorwa ku iyicwa rya Dusabumuremyi Syldio.

Urupfu rwa Dusabimana Syldio bivugwa ko ari umurwanashyaka wa FDU-Inkingi rwamenyekanye ku wa 24 Nzeri 2019, bivugwa ko yiciwe aho yakoraga muri kantine mu Kigo nderabuzima cya Shyogwe mu Karere ka Muhanga.

RIB yatangaje ko Ingabire yahamagajwe kugira ngo atange amakuru yafasha mu iperereza.

Ati “Ejo tariki ya 1/10/2019 Victoire Umuhoza yitabye ubugenzacyaha kugira ngo atange amakuru yafasha mu iperereza riri gukorwa ku iyicwa rya Dusabumuremyi Sylidio nk’uko amaze igihe abivuga mu itangazamakuru”.

Ingabire aherutse kuvugana n’ibinyamakuru birimo na BBC abibwira ko bigaragara ko abishe Dusabumuremyi ari abantu bigaragara ko batojwe kwicisha ibyuma.

RIB yatangaje ko mu iperereza ry’ibanze hafashwe abantu babiri bakekwa kugira uruhare muri ubwo bwicanyi. Iperereza rirakomeje kugira ngo hamenyekane abamwishe n’icyo bari bagambiriye.

Icyo gihe RIB yasabye umuntu wese waba afite amakuru yafasha iperereza kubakoze ubu bwicanyi ko yayatanga kuri station ya RIB imwegereye.

src:IGIHE





Tanga igitekerezo kuri iyi nkuru



Igitekerezo