Perezida Kagame ashimangira ko Abagore ari inkingi ikomeye y’imibereho myiza n’ubukungu mu gihugu

Kuri uyu wa Kane tariki ya 8 Werurwe 2018 ubwo hizihizwa Umunsi Mpuzamahanga w’Abagore, Perezida Paul Kagame yavuze ko abagore ari inkingi ikomeye y’imibereho myiza n’ububukungu by’igihugu kandi ko u Rwanda rwateye intambwe mu guha abagore n’abakobwa ubushobozi bukwiye.

Learn how to Thrive

Mu gihe ku wa 8 Werurwe 2018 hizihizwa Umunsi Mpuzamahanga w’Abagore, Ibiro by’ Umukuru w’igihugu byatangaje ubutumwa bwa Perezida Kagame wavuze ko ari “umunsi ukwiye kugira icyo tuwuvugaho kuko ufite agaciro kanini”.

Yifurije abagore umunsi mwiza mpuzamahanga wabahariwe, avuga ko Isi yose imaze gutera intambwe ndende mu guha abagore n’abakobwa ubushobozi bukwiye kandi u Rwanda rwagize uruhare rwarwo.

Yagize ati “Aho tugeze ubu, twahageze kubera imiyoborere myiza, ivugururwa ry’amategeko na politike nziza muri rusange. Abantu bose bakomeje kumva ko ubusumbane hagati y’abagabo n’abagore nta nyungu bufite, ahubwo ko butera igihombo kinini.”

Ubutumwa bwe bukomeza buvuga ko u Rwanda rushya rw’uyu munsi rwubatswe ari uko agaciro, uruhare n’inshingano by’abagore mu gihugu bihawe umwanya bikwiye, kandi rwarabiharaniye.

Perezida Kagame yagize ati “ Abagore ni inkingi ikomeye y’imibereho myiza n’ubukungu mu gihugu muri rusange. No mu bihe by’intambara cyangwa amakimbirane, bagira uruhare runini mu kubungabunga amahoro n’umutekano.”

PNG - 417 kb
Perezida Kagame ati " Abagore ni inkingi ikomeye y’imibereho myiza n’ubukungu mu gihugu"


Yakomeje avuga ariko ko ku Isi yose itaragera ku guha gaciro gakwiye umugore.
Ati “Ibimaze iminsi bivugwa mu makuru, bijyanye n’ihohoterwa rikomeje gukorerwa abagore, bikwiye kudukangurira twese ko ibyo tumaze kugeraho tutabifata nk’ibisanzwe, ahubwo ko tugomba kubirinda. Haracyari byinshi byo gukorwa kugira ngo abagore bumve ko bafite umutekano n’amahirwe angana n’ay’abandi.”

Kugira ngo bigereho, Umukuru w’Igihugu yavuze ko ari ngombwa abagore n’abagabo bakorera hamwe kandi ko byungura bose.

Ati “Nta gihombo giterwa n’uburinganire hagati y’abagore n’abakobwa n’abasaza babo, kandi bafite ububasha bungana. Ahubwo tubyungukiramo twese.”

Itegeko Nshinga rya Repubulika y’u Rwanda ryo mu 2003 ryavuguruwe mu 2015,ryafunguriye amaremo umugore mu buyobozi, rivuga ko bagira nibura 30% by’imyanya mu nzego zifatirwamo ibyemezo.

U Rwanda ruza ku isonga ku Isi mu kugira ubwiganze bw’abagore mu Nteko Ishinga Amategeko kuko bihariye 64%.

PNG - 867.6 kb
Inteko Inshinga Amategeko y’u Rwanda iza ku isonga mu zifite umubare munini w’abagore ugereranyije n’izindi

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo