Nyabihu: Nta gisubizo akarere gafite ku kidendezi cy’amazi gikomeje kwimura abaturage muri Jenda

Nk’uko abatuye akagari ka Bukinanyana mu murenge wa jenda akarere ka Nyabihu baherutse kubitangariza TV/Radio1 ngo ubwo hakorwaga umuhanda Musanze-Rubavu ni bwo batangiye guhura n’ikibazo cy’amazi amanuka ari menshi yagera mu mudugudu wa Bugarama akabura inzira bityo kuri ubu ngo hakaba hariremye ikidendezi kimaze kwimura abatari bake mu bari bahatuye.

Uretse abamaze kwimurwa n’ayo mazi, n’abakihatuye bavuga ko bakomeje guterwa impungenge n’uko ayo mazi akomeza kwiyongera uko imvura igenda igwa ku buryo ngo ashobora kuzakomeza kwimura n’abandi, ikindi kandi no kuba yaba indiri y’imibu n’utundi dukoko na byo babigaragaza nk’ibishobora kubagabiza indwara.

Umuyobozi w’akarere ka Nyabihu UWANZWENUWE Théoneste, yabwiye TV/Radio1 ko nta gisubizo nk’akarere bafite kuri iki kibazo kuko gishamikiye ku kindi kibazo cy’amazi aturuka mu birunga ku buryo atari ikibazo cyasubizwa n’akarere kamwe gusa, bityo na bo ngo bakaba bategereje ikizava mu nyigo irimo gukorwa kuri iki kibazo ku rwego rw’igihugu.

Mu minsi mike ishize minisitiri w’ubutegetsi bw’igihugu Francis Kaboneka yagaragaje iki kibazo nka kimwe mu bikomeye bikwiye kwitabwaho mu maguru mashya nk’uko yanabigarutseho mu butumwa bwihariye yageneye Musabyimana Claude wahoze ayobora intara y’amajyaruguru, ubwo bari mu muhango wo gusezera kuri iyi mirimo yerekeje mu nshingano nshya nk’umunyamabanga Uhoraho muri Minisiteri y’Ubutaka n’Amashyamba.

Minisitiri Kaboneka yagize ati: “Nziko hari inyigo zirimo gukorwa, ariko nk’umuntu uzi uburemere bw’iki kibazo turagusaba ko muzihutisha tukabasha kubona igisubizo kirambye”.

Ikibazo cy’aya mazi aturuka mu birunga, ni ikibazo abahaturiye bavuga ko kitahozeho, ahubwo ngo kirimo gukaza umurego muri iyi minsi, bigatuma bibaza impamvu yaba irimo kubitera.

Hagati aho abatuye ahiremye ikizenga cy’amazi mu kagari ka Bukinanyana mu murenge wa Jenda bo bakomeje kugaragaza impungenge ko igihe imvura y’itumba yahindura nta kirakorwa ngo aya mazi ashakirwe inzira bishobora kuzabateza akaga gakomeye





Tanga igitekerezo kuri iyi nkuru



Igitekerezo