Ntimugire ikibazo ndarahira vuba nka Perezida wa Kenya-Raila Odinga

Umuyobozi w’Impuzamashyaka atavuga rumwe na Leta muri Kenya (NASA), Raila Odinga, yahumurije abarwanashyaka be bahora bamusaba gukora ibishoboka byose akarahirira kuyobora Kenya ababwira ko bidatinze abakura mu gihirahiro akabayobora nkuko babimwifuzaho.

Raila Odinga yahumurije abarwanashyaka be ababwira ko ibikorwa byo kurahira nka Perezida wa Kenya bikomeje kwitegurwa bityo ngo ntibagire impungenge kuko bidatinze ararahira.

Ubwo yaganiraga na bamwe mu bayobozi b’itorero rya St.Peter Nyamira Parish, Odinga yavuze ko ukuri kose kuzajya ahagaragara mu mwaka utaha wa 2018, umwaka anavuga ko uzaba uw’impinduka zikomeye mu gihugu cya Kenya.

PNG - 769.4 kb
Odinga aganira n’abayobozi b’itorero rya St.Peter Nyamira


Mu magambo ye Odinga yagize ati “abarwanashyaka bange ndabazirikana bityo ntibagire impungenge rwose ibikorwa byo kurahira ntacyabisibya biracyategurwa”. Odinga yongeyeho ko Kenya itagomba kurangiza umwaka wa 2018 ikiyoborwa n’abanyagitugu.

PNG - 731 kb
Odinga n’abarwanashyaka be


Odinga yakomeje agira ati “abibeshya ko twirengagije ibikorwa byoo kurahira baribeshya kuko ntacyatubuza kurahira kugira ngo tunerekane intsinzi yacu twegukanye tutitaye ko Leta iriho yashatse kuyiburizamo”.

Bamwe mu bayobozi bakomeye ba Kenya barimo n’abacamanza bakuru b’igihugu cya Kenya nka Githu Muigai yewe n’ibihugu bitandukanye birimo na Leta Zunze Ubumwe za Amerika ntibyasibye guha Odinga gasopo yo kudahirahira ngo arahire kuko bishobora gushyira igihugu mu kaga.

Odinga kandi yabwiwe ko mu gihe yaba arenze ku mategeko akarahira, hari ibihano bimutegereje birimo no kuba yatabwa muri yombi ariko akomeza kuvunira ibiti mu matwi akavuga ko azarahirira kuyobora Kenya bidatinze.

Odinga yatsinzwe na Uhuru Kenyatta mu matora yabaye muri Kanama 2017, aregera urukiko rw’Ikirenga rutesha agaciro ibyayavuyemo.

Mu matora yakurikiyeho mu kwezi k’Ukwakira, Odinga yanze kuyitabira avuga ko atizeye ibizayavamo, Uhuru yiyamamaza wenyine aratsinda, anarahirira kuyobora igihugu.

Odinga ntiyemera ko yatsinzwe, avuga ko ahubwo amajwi ye yagiye yibwa bityo ko mu gihe hadateguwe andi matora aciye mu mucyo.

Odinga yavuze ko yabanje gutegereza yizeye ko Uhuru Kenyatta azemera kugirana ibiganiro n’abatavuga rumwe na we ariko ngo bigaragara ko bitagishobotse nk’uko Daily Nation iherutse kubitangaza.

Tariki 12 Ukuboza 2017 Odinga yari yatangaje ko azarahira ariko aza kubisubika ku munota wa nyuma.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo