Meya na Visi Meya b’Akarere ka Nyabihu beguriye icyarimwe ku mirimo yabo

Umuyobozi w’Akarere ka Nyabihu, Uwanzwenuwe Théoneste na Visi Meya ushinzwe imibereho myiza y’Abaturage muri aka karere, Mukansanga Clarisse, beguye ku mirimo yabo ku mpamvu bavuze ko ari izabo bwite.

Ku murongo wa Telefoni na GASARABWE Jean Damascène, Perezida w’Inama Njyanama y’Akarere ka Nyabihu yemereye Umubavu.com aya makuru y’ubwegure bw’aba bayobozi mu gitondo cyo kuri uyu wa Gatanu tariki 11 Gicurasi 2018 avuga ko beguye ku mpamvu zabo bwite nkuko bigaragara ku mabaruwa yabo.

GASARABWE Jean Damascène yagize ati “ ayo makuru niyo nange muri iki gitondo nabonye ibaruwa ya Meya na Visi Meya ushinzwe imibereho myiza y’Abaturage muri aka karere bavuga ko beguye ku mpamvu zabo bwite”.

By’umwihariko Mukansanga Clarisse yeguye ku mirimo ye hashize iminsi aherutse gushinjwa ko yanze kwakira buji yo gucana urumuri rw’icyizere mu muhango wo kwibuka Jenoside yakorewe Abatutsi wabaye ku wa 12 Mata 2018 avuga ngo nibazihe abafite ababo bibuka.

Abaturage bari bitabiriye uyu muhango bavuze ko ‘abandi bayobozi bose bari ku murongo umwe bafite urumuri. Uwamuhereje buji [Mukansanga] aramubwira ngo yisubizeyo uyihereze bariya bo hirya, undi arongera aragaruka amuhereza ‘buji’ aramubwira ngo hereza bariya bo hirya nibo bafite ababo bari kwibuka.”

Gusa mu kiganiro na IGIHE, uyu muyobozi yahakanye ibyo ashinjwa avuga ko ayo magambo atigeze ayavuga.

Yagize ati “ Oya ntabyo navuze, navuze ngo hari abantu benshi batazifite babanze bazibahe nabonaga hari abantu benshi badafite buji. Uwaba yakomeretse rero sinzi ubwo yabifashe uko bitari. Ahubwo bari gukomereka kurushaho iyaba twese dufite buji hari abatazifite.”

Ku rundi ruhande umuyobozi w’Akarere wungirije mu karere ka Nyabihu akaba anakomoka mu ishyaka rya PSD (umutwe wa politike) we yari yavuze ko aya magambo atashimishije abantu aho bari banasabye ko yakurikiranwa.

Juru Anastasie Peresida wa Ibuka mu karere ka Nyabihu yabwiye Flash ko bagiye ku bikurikirana ndetse nabo bakorana bakazabimubaza.

Yagize ati, “ ariko nabyumvishije bwari bumaze gucya ariko bibaye ari byo, ntabwo byaba aribyo, uko nk’umuyobozi ntabwo akwiye kwanga kwakira urumuri rw’ikizere ntabwo yakabaye avuga ngo nibabanze bahe bariya bibuka. Tugiye kubanza turebe abayimuhaye ariko ko n’uburyo yayanze noneho twe tumwegere tumubaze ariko ntabwo aritwe tuzamubaza afite abo bakorana tuzamwegera tumubaze igituma adafata buji nk’abandi.”

Meya w’akarere ka Nyabivu bwana Uwanzwenuwe Theoneste we yari yavuze ko icyo kibazo atakizi ariko ko aho abanyarwanda bageze ntawagakwiye kuvuga ibintu nk’ibyo ariko bibaye aribyo uwabivuze ngo ya kurikiranwa kugiti cye.

Yagize ati, “Ndagirango nkumenyeshe ko icyo kibazo ntari nkizi kuko aho abanyarwanda bageze ntekereza ko ntawatinyuka gukora ikintu nk’icyo ngicyo gusa bibaye aribyo yakurikiranwa kugiti cye.”

Akarere ka Nyabihu ni kamwe mu turere turindwi tugize Intara y’u Burengerazuba, imyaka ishize ntabwo kabashije kwitwara neza mu kwesa imihigo kabaga kahize.

Mu mwaka wa 2013/2014, Nyabihu yabaye iya 22, mu wa 2014/2015 nabwo iba iya 22, uwa 2015/2016 iba iya 23. Mu wa 2016/2017 yabaye iya 24. Guhera muri 2011/2012, aka karere ntikazi uko kuza mu myanya y’imbere ya 20 bisa.

Magingo aya, Akarere ka Nyabihu nta Komite Nyobozi gafite kuko abayigize bose beguye mu bihe bitandukanye guhera muri Werurwe 2018.

Ku ikubitiro heguye Mugwiza Antoine wari Umuyobozi w’Akarere ka Nyabihu wungirije ushinzwe ubukungu, ibaruwa isezera kuri iyo mirimo yayitanze tariki ya 7 Werurwe 2018, avuga ko ari ku mpamvu ze bwite.

Hakurikiyeho Umunyamabanga Nshingwabikorwa w’Akarere, Ngabo James, weguye ku mirimo ye ku wa 17 Mata 2018, nawe avuga ko yeguye ku mpamvu ze bwite.

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo