Leta ya Israel yakuye u Rwanda mu bihugu bizakira abimukira ku mpamvu ikomeje kugirwa ubwiru

Mu gitondo cyo kuri uyu wa Gatatu tariki ya 4 Mata 2018 nibwo Leta ya Israel yabwiye urukiko rukuru ko irigushaka ikindi gihugu cyo kwakira abimukira, ibi bikaba byaraje nyuma yaho u Rwanda rukuweho icyizere n’uru rukiko cyo kuba kimwe mu bihugu byakwakira aba bimukira nyamara impamvu igakomeza kugirwa ibanga.

Leta ya Israel itangaje ibi nyuma yaho hacicikanye amatangazo menshi ajyanye n’amabwiriza areba abimukira ndetse ikanasaba ko abari bafungiwe muri gereza ya Sharonim basaga 58 bazira kwanga kwimurirwa mu Rwanda bahita bafungurwa byihuse.

Igihigu gishyirwa mu majwi ko kizakira aba bimukira ni Uganda gusa hakomejwe kwibazwa uko bizagenda mu gihe iki gihugu nacyo cyabitera utwatsi mu gihe benshi muri aba bimukira byitezweko bakomeza gufungurwa ariko bakaba badakozwa ibyo kwerekeza i Kigali nk’uko Jerusalem Post dukesha iyi nkuru ibitangaza.

Leta ya Israel yahamije ko yamaze kohereza intumwa yayo mu rwego rwo kureba niba iki gihugu cyitezweho kwakira aba bimukira cyaba cyujuje ibyo urukiko rukuru rwa Israel rusaba. Iyi Leta yavuze ko n’ubwo u Rwanda kugeza ubu arirwo rwagenzuwe gusa, biteganyijwe ko ibyavuye muri iri genzura biri butangarizwe urukiko rukuru kuri uyu wa kane tariki ya 5 Mata 2018.

Israel ivuga ko ibi byari byarakomeje kugirwa ibanga kubera impamvu z’ububanyi n’amahanga bityo bikaba byari bikwiye ko hakwirindwa ko aya makuru yagera kuri rubanda mu buryo ubwo ari bwo bwose.Gusa yemeye ko ibitangazamakuru bishobora kuba hari zimwe mu mpamvu byamaze gushyira ku karubanda.

Ikindi kandi Israel yavuze ko izakomeza gufungura abimukira bari bafungiwe muri gereza ya Sharonim iri mu butayu bwa Negevu mu gihe bigaragaye ko u Rwanda rutari rwujuje ibisabwa ndetse ko yiteguye gutega amatwi byimbitse aboherejwe mu Rwanda badahawe andi mahirwe yo kujya mu kindi gihugu.

Ibi bitangajwe nyuma yaho Minisitiri w’Intebe wa Israel, Benjamin Netanyahu ku wa Mbere, abinyujije ku rukuta rwe rwa facebook, avuga ko mu byumweru bishize umuryango New Israel Fund ufatanyije n’Umuryango w’Ubumwe bw’u Burayi, bashyize igitutu ku Rwanda bigatuma rwisubiraho ku masezerano yo kwakira abimukira bakomoka muri Afurika badashakwa muri Israel.

Ku rundi ruhande,Urukiko Rukuru rwa Israel rwari rwatangaje ko abimukira badakwiriye koherezwa mu Rwanda kuko ngo rutujuje ibisabwa byose. Nyamara u Rwanda rwo rwari rwatangaje ko imiryango ifunguye ku bimukira mu gihe hazaba hubahirijwe amategeko mpuzamahanga.

Leta ya Israel irateganya kwimura abimukira basaga ibihumbi 16 nk’uko ibiro ntaramakuru by’Abongereza(Reuters) byabitangaje mu minsi ibiri ishize. Ikindi kandi ntawakwirengagiza ko abatavugarumwe na Leta y’u Rwanda batahwemye kwamagana ko u Rwanda rwakwakira abimukira bo muri Israel.

PNG - 816.2 kb
Abimukira bari ku butaka bwa Israel ntibakozwa ibyo kujyanwa mu bindi bihugu

@Umubavu.com





Tanga igitekerezo kuri iyi nkuru



Igitekerezo