Ishyaka ANC ryahaye Perezida Zuma amasaha 48 yo kuba yavuye ku butegetsi

Ku munsi w’ejo tariki ya 12 Gashyantare 2018, nibwo ibitangazamakuru bitandukanye birimo na BBC byatangaje inkuru ivuga ko byari byitezwe ko Perezida Jacob Zuma arara avuye ku butegetsi, ariko nyuma y’umwiherero w’ishyaka ANC, biravugwa ko nta cyaraye kigezweho. Gusa hari amakuru avuga ko bamwe mu bafata ibyemezo bikomeye mu ishyaka ANC bahaye Perezida Zuma amasaha 48 yo kuba yarekuye ubutegetsi, icyakora aya makuru nayo ntaremezwa neza n’iri shyaka nubwo yatangajwe n’ibitangazamakuru bya Leta ya Afurika y’Epfo.

Abayobozi bishyaka ANC, riri ku butegetsi muri Afrika y’Epfo ndetse n’Abarwanashyaka baryo biriwe mu mwiherero kugeza ku mugoroba wo kuri uyu wa Mbere bataragira icyo bageraho, ku ngingo yo kweguza Perezida Jacob Zuma udashaka kuva ku butegetsi.

Abayobozi bagera kuri 107 bo ku rwego rwo hejuru rufata ibyemezo mu ishyaka ANC bahuriye muri Hoteri iri mu Mugi wa Pretoria kuva ku gicamunsi cyo kuwa Mbere bashaka uburyo bakuraho Perezida bavuga ko amaze kubashyira mu bibazo bitagira ingano.

Amakuru yatangajwe na Radiyo Televiziyo yo muri Afrika y’epfo, SABC avuga ko hari imodoka zatwaye umukuru wa ANC, Cyril Ramaphosa zikamugeza aho Perezida Jacob Zuma akorera , bivugwa ko yari agiye kumumenyesha ko ishyaka ryafashe icyemezo cyo kumuha amasaha 48 ngo abe yeguye ku butegetsi. Ariko ayo makuru ntaremezwa n’ubuyobozi bw’ishyaka.

Bivugwa ko Perezida Zuma naramuka yanze kwegura hakurikijwe amategeko y’ishyaka rya ANC, inzira izaba isigaye azaba ariyo gukurwa ku butegetsi biciye mu Nteko Inshinga Amategeko.

Mu cyumweru gishize, Cyril Ramaphosa umuyobozi ukomeye mu ishyaka rya ANC, yagiranye ibiganiro na Perezida Zuma amaso ku yandi kugira ngo barangize icyo kibazo mu nzira y’ubwumvikane nyamara ibyo biganiro ntacyo byavuyemwo.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo