Hashize iminsi Dr Sezibera Richard wari Umusenateri agizwe Minisitiri w’Ububanyi n’Amahanga, umwanya yasimbuyeho Louise Mushikiwabo watorewe kuyobora Umuryango w’Ibihugu bikoresha ururimi rw’Igifaransa (OIF), byatumye benshi batekereza ko uyu mwanya ugomba kubona uwujyamo nyamara Sena y’u Rwanda igiye kumara hafi umwaka wose igizwe n’Abasenateri 25 gusa kuko amategeko atemera ko asimbuzwa.

Tariki 18 Ukwakira nibwo Perezida Paul Kagame yavuguruye Guverinoma, Sezibera wari umusenateri agirwa Minisitiri w’ububanyi n’amahanga n’Umuryango wa Afurika y’Iburazirazuba.

Ubwo Minisitiri Dr Sezibera yaramutsaga Perezida Paul Kagame nyuma yo kurahirira kuba Minisitiri w’Ububanyi n’Amahanga ku wa 19 Ukwakira, mu Ngoro y’Inteko Ishinga Amategeko

Sezibera yari agiye kumara imyaka ibiri ari umusenateri kuko yinjiye muri Sena mu Ukuboza 2016 asimbuye Mucyo Jean de Dieu witabye Imana.

Itegeko Ngenga rigenga amatora mu Rwanda riteganya ko mu gihe umusenateri watowe yeguye, apfuye, avanywe ku murimo n’icyemezo cy’urukiko cyangwa agize indi mpamvu imubuza burundu kurangiza inshingano ze, Perezida wa Sena abimenyesha Komisiyo y’amatora mu gihe cy’iminsi icumi.

Amatora yo kumusimbura akorwa iyo igihe cya manda y’abasenateri gisigaye kingana nibura n’umwaka umwe. Bivuze ko Dr Sezibera adashora gusimbuzwa kuko Manda y’Abasenateri isigaje igihe kitageze ku mwaka ngo irangire.

Umunyamabanga Nshingwabikorwa wa Komisiyo y’Igihugu y’amatora, Munyaneza Charles yemereye IGIHE ko nta matora azaba yo kumusimbura.

Yagize ati “Ntabwo bizashoboka kuko ntabwo umwaka wari ukirimo, twamaze no kubimenyesha Inteko, ntabwo amatora azaba.”

Itegeko Nshinga ryo mu 2003 ryageneraga abasenateri manda imwe y’imyaka umunani ishobora kongerwa. Nyuma yo kuvugururwa mu 2015, Itegeko Nshinga ubu ryemerera abasenateri manda y’imyaka itanu ishobora kongerwa inshuro imwe.

Manda y’abasenateri izarangira umwaka utaha yatangiye tariki ya 10 Ukwakira 2011, nyuma y’amatora yari yabaye tariki 26 na 27 Kanama uwo mwaka.

Sena y’u Rwanda igizwe n’abasenateri 26. Barimo 12 batorwa n’inzego zihariye hakurikijwe inzego z’imitegekere y’Igihugu; 8 bashyirwaho na Perezida wa Repubulika, 4 bashyirwaho n’Ihuriro ry’Igihugu Nyunguranabitekerezo ry’Imitwe ya Politiki; Umwarimu umwe cyangwa umushakashatsi wo muri Kaminuza no mu Mashuri Makuru bya Leta, n’umwarimu umwe cyangwa umushakashatsi wo muri Kaminuza no mu Mashuri Makuru byigenga.

Dr Sezibera yari ahagarariye intara y’Amajyepfo mu basenateri 12 batorwa n’inzego zihariye.

Ubwo Dr Sezibera Richard wasimbuye Louise Mushikiwabo muri Minisiteri y’Ububanyi n’Amahanga yarahiriraga inshingano nshya ku wa 19 Ukwakira.

@Umubavu.com

---

---