Ethiopia igiye kurekura imfungwa zose za politiki

Minisitiri w’Intebe wa Ethiopia, Hailemariam Desalegn, yatangaje kuri uyu wa Gatatu ko Leta igiye kurekura imfungwa zose za politiki no gufunga gereza ikomeye ya Maekelawi, iherereye mu Murwa Mukuru, Addis Ababa.

Nyuma yo gufungwa iyi gereza isanzwe ishyirwa mu majwi ko ikorerwamo iyicarubozo, biteganijwe ko izagirwa inzu ndangamurage, hakanubakwa indi yujuje ibisabwa.

BBC yanditse ko Hailemariam yabwiye itangazamakuru, ko imfungwa za Politiki zari zitegereje kugezwa imbere y’ubutabera zihanaguweho ibyaha kandi ko bikozwe mu rwego rwo gushyigikira ibiganiro bya politiki, amaze iminsi agirana n’abo mu itsinda ry’amashyaka yishyize hamwe aharanira impinduka n’ukwishyira ukizana kw’abaturage (EPRDF).

Ethiopia isanzwe ishyirwa mu majwi n’imiryango iharanira uburenganzira bwa muntu, ku gufunga bya hato na hato abatavuga rumwe na Leta, gusa yo igahakana ko nta mfungwa n’imwe ya politiki igira, ko ari abanyabyaha basanzwe.

Kugeza ubu, nta mubare w’imfungwa za politiki ziri muri gereza zo muri iki gihugu uratangazwa ariko abenshi batawe muri yombi mu 2015, ubwo habaga imvururu, basaba amavugurura mu bukungu no muri politiki.





Tanga igitekerezo kuri iyi nkuru



Igitekerezo