Burera: Polisi, ubuyobozi bw’inzego z’ibanze n’abaturage bangije urumogi n’inzoga zitemewe

Mu bikorwa byo kurwanya ibiyobyabwenge Polisi y’u Rwanda irimo mu turere dutandukanye, kuwa gatatu tariki ya 2 Gicurasi Polisi y’u Rwanda ikorera mu karere ka Burera, ubuyobozi bw’inzego z’ibanze n’abaturage bangirije mu ruhame ibiyobyabwenge by’urumogi na kanyanga n’inzoga zitemewe, byose bifite agaciro gakabakaba Miliyoni imwe y’amafaranga y’u Rwanda.

Iki gikorwa cyabereye mu kagari ka Rusumo mu murenge wa Butaro, ubuyobozi bw’inzego z’ibanze bukaba bwari buhagarariwe n’ umunyamabanga nshingwabikorwa w’umurenge wa Butaro Ndayisaba Egide, naho Polisi ikaba yari ihagarariwe n’umuyobozi wa Sitasiyo ya Polisi ya Butaro Inspector of Police (IP) Jean de Dieu Nkuranga.

Ibyangijwe ni udupfunyika 300 tw’urumogi, Litiro 258 za kanyanga, amaduzeni 123 ya Chief Warage, amaduzeni 104 ya Blue Sky, amaduzeni 60 ya Chase Warage na Litiro 100 z’inzoga z’inkorano, byose byafatiwe mu tugari dutandukanye tw’umurenge wa Butaro mu gihe mezi abiri ashize

Nyuma yo kwangiza ibi biyobyabwenge, umunyamabanga nshingwabikorwa w’umurenge wa Butaro yasabye abagifite umuco wo kwishora mu biyobyabwenge ku bihagarika, kuko uretse kuba bihungabanya umutekano bikanagira ingaruka ku buzima bw’ubikoresha, binadindiza ubukungu bw’igihugu mu gihe bifashwe bikangizwa amafaranga yashowe ntagaruke.

IP Nkuranga yashimiye abaturage bari aho ubufatanye badahwema kugaragariza Polisi mu gukumira ibyaha bitandukanye.

Yagize ati:’’ ibikorwa byose dukora, ibyinshi tubigeraho kubera ubufatanye bwiza dufitanye n’abaturage binyuze mu makuru duhabwa, tugahita tuyakurikirana tukabasha gukumira ibyaha bitaraba, ari nako byagenze tukabasha gufata urumogi n’inzoga z’inkorano twangije kuri uyu munsi.”

Yanasabye abaturage kurushaho kuba maso, bakarwanya abakomeje kwinjiza ibiyobyabwenge mu gihugu.

Yaravuze ati:’’Agace dutuyemo gafatwa nk’inzira yinjiza ibiyobyabwenge cyangwa inzoga zitemewe mu gihugu bituruka mu bihugu by’abaturanyi, niyo mpamvu uruhare rwa buri wese rukenewe mu kubirwanya atangira amakuru ku gihe.’’

IP Nkuranga yasoje avuga ko ingamba zo kurwanya ibiyobyabwenge zakajijwe, ko ubicuruza nta mahirwe afite akwiye kubireka.





Tanga igitekerezo kuri iyi nkuru



Igitekerezo