Birangiye Odinga arahiriye kuyobora igihugu uwari kuba Visi Perezida we yitandukanya nawe

Nkuko Raila Odinga, Umuyobozi w’Impuzamashyaka atavuga rumwe na Leta ya Kenya, NASA, atasibye kubitangaza ko azarahira nka Perezida w’igihugu, kuri uyu wa Kabiri tariki ya 30 ,utarama 2018 ku kibuga kizwi nka Uhuru Park birashyize ararahira mu gihe Kalonzo Musyoka byari biteganyijwe ko nawe arahira nka Visi Perezida atitabiriye uyu muhango afatanyije n’abandi barwanashyaka bakuru b’ishyaka,umuhango wabaye Perezida Uhuru Kenyatta ari mu nama y’ abakuru b’ ibihugu I Addis Abeba mu gihugu cya Ethiopia.

Abashyigikiye Raila Odinga utavuga rumwe n’ ubutegetsi bwa Kenya mu mugambi wo kurahirira kuyobora iki gihugu, bazindutse kare kare berekeza kuri Uhuru Park ahari hateganyijwe kubera uyu umuhango wo kwakira indahiro y’ uyu munyapolitiki.
Nubwo kwikubitiro polisi ya Kenya yari yatangaje ko itari bwemerere abashyigikiye Odinga kugera kuri Uhuru Park, amakuru ndetse n’ amafoto aturuka muri Kenya biremeza ko abantu batandukanye bitabiriye uyu muhango ku bwinshi.

PNG - 792.7 kb
Abayoboke ba Odinga bari babukereye kumushyigikira


Mu ijambo yagejeje ku bitabiriye irahira rye, Odinga byagaragaraga ko yijimye mu maso, yavuze ko azarinda Itegeko Nshinga n’andi mategeko mu gihe nyamara yari yabujijwe kurahira abwirwa ko mu gihe yaba arenze ku matagako yazajyanwa mu nkiko ashinjwa kugambanira igihugu.

PNG - 768.3 kb
Byagaragaraga ko Odinga yari yijimye mu maso


Wakwibaza uti Uhuru Kenyatta wamaze kurahirira kuyobora iki gihugu arimo gukora iki mu gihe uwo bahanganye agiye kurahira.
Amakuru atangazwa n’ ikinyamakuru cyo muri Kenya Pulselive aravuga ko Perezida Uhuru Kenyatta magingo aya yibereye mu nama y’ abakuru b’ ibihugu I Addis Abeba mu gihugu cya Ethiopia.

PNG - 615.6 kb
Odinga yarahiriye kuyobora igihugu mu gihe Perezida U. Kenyatta ari mu nama y’ abakuru b’ ibihugu I Addis Abeba mu gihugu cya Ethiopia.


Uyu muyobozi yamaganye amakuru yavuzwe n’ubuyobozi bwa Nairobi ko Uhuru Park izakoreshwa kuri uwo munsi. NASA ngo izarahiza Raila Odinga nka Perezida, na Kalonzo Musyoka nka Visi Perezida we kuri ubu wamaze kwitandukanya na Odinga yanga kurahira afatanyije n’abandi barwanashyaka bakuru b’ishyaka barimo Moses Wetang’ula and Musalia Mudavadi.

PNG - 715.3 kb
Odinga yarahiye wenyine


Umuyobozi wa polisi y’ umugi wa Nairobi Japheth Koome ya Nairobi, yatangaje ko nta nama n’imwe igomba kubera mu gace ka Uhuru Park.
Odinga yarahiye mu gihe mu Gushyingo umwaka ushize, Uhuru Kenyatta yarahiriye kuyobora Kenya, ni umuhango witabiriwe n’abakuru b’ibihugu barenga 10, barimo na Perezida w’u Rwanda Paul Kagame.

Kenyatta yagiye kuri uyu mwanya nyuma yo gutsinda amatora yasubiwemo tariki ya 26 Ukwakira aho yagize amajwi arenga 98%.

Mu matora yari yabanje, Komisiyo y’amatora yari yemeje ko Uhuru Kenyatta yatsinze Raila Odinga ku majwi 54,27%, mu gihe Odinga yari yagize 44,74%.

Gusa Odinga yanze iki cyemezo, avuga ko habayeho kwiba amajwi, ahita anatanga ikirego mu Rukiko.
Nyuma yo gusubirishamo amatora, Odinga yanze kuyitabira ahubwo avuga ko ari we mukuru w’igihugu.

Irahira rya Odinga kandi risize bimwe mu bitangazamakuru bikomeye mu gihugu cya Kenya nka NTV na Citizen TV & Radio bifunzwe mu gitondo cyo kuri uyu wa Kabiri ku buryo bitari kumvikana cyangwa ngo bigaragare mu gihugu hose bikavugwa ko byazize ko byashakaga kwerekana umuhango w’irahira rya Raila Odinga.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo