Amwe mu mayeri abanyepolitiki  bakoresha ngo babashe gutegeka abaturage

Abenshi bumva ko politiki ari umukino , ariko mu buryo rusange ni ubuhanga bwo gutegeka , guhuriza hamwe abo utegeka bakakwemera bakakumva bakumva neza ko ufite icyo ubamariye gutandukanye n’abandi bategetsi basanzwe.

Nk’’uko bigenda ku bakina dame cyangwa igisoro, Politiki ni ukumenya neza ingaruka za buri gikorwa ukoze, ugapima neza niba cyiza kunegwa cyangwa kwakirwa n’abaturage neza guhorana ijisho rikanuye no gusobanukirwa neza n’ingaruka za buri gikorwa ku buryo neza ubona ibisa nk’ibyafatwa nabi mu maso ya rubanda,nyamara bishobora kugira ingaruka nziza mu gihe kizaza cyangwa ku nyungu z’ubutegetsi.

Iyi ni politiki , hari icyo bita “manipulation” icyafatwa nko kuyobya abaturage kubumvisha neza ibyo ushaka bakabyemera kandi ntibasobanukirwe icyo ugamije bagakurikira butama.

Tugarutse ku mayeri akoreshwa muri politiki muri iki gihe ahanini hifashishishwa itangazamakuru mu gucurira abaturage ibitekerezo, rubanda bagatekereza uko abanyapolitiki babyifuza byanze bikunze.

Dore rero amayeri akoreshwa n’ubutegetsi mu isi :

1.Ubuhanga bwo kurangaza rubanda

Ni iyeri rikoreshwa n’abanyapolitiki aho batuma abaturage bahugira ku tuntu dutoduto babahimbiye amaso bakayakura ku bibazo binini bya politiki nk’ibiganiro ku bintu bitabafitiye agaciro kanini.

Iyi ni intwaro ikomeye mu kuyobora rubanda nko kubashyiriraho amarushanwa y’ imikino , imiziki guhimba…, ubundi ugahamagara abanyamakuru bakabyivurugutamo akaba aribyo birirwa babwira abaturage ahari ikibazo kikaba gikemurwa mu gihe rubanda bahugiye muri ibyo

2.Guhimba ibibazo bisa nk’ibibangamiye rubanda ubundi rubanda bagatakambira ubutegetsi ngo bubatabare

Aha ni ho ubutegetsi bukura amanota y’ubutabazi ku bibazo bwihimbiye. UHIMBA IBIBAZO UGIRE ICYO UKORA UBUNDI USHAKE IBISUBIZO .

Aya mayeri icyo amaze ni ugushaka icyo rubanda bari buze gukora kandi n’ubundi ntakindi bakora cyeretse gutabaza ubutegetsi bukabafasha.

Urugero : Ubutegetsi bushobora gutiza umurindi amabandi mu mujyi akishora mu bikorwa by’urugomo gufata abagore ku ngufu , kurwana n’abashinzwe umutekano , gutera ibisasu hagamijwe gukora imikwabu no guta muri yombi abatavuga rumwe n’ubutegetsi cyangwa abandi bagambiriwe ubundi imikwabu igakara urusasu rukavuga, inzu z’ubucuruzi zigafungwa abaturage bagacanganyikirwa, bagasaba ubutegetsi ko bugira icyo bukora.

Icyo leta ikora nta kindi ni ugushyiraho imikwabu hagakora amategeko ya gisirikare ibihe bidasanzwe aha icyitwa ubwisanzure mu kugira icyo uvuga cyangwa gutanga ibitekerezo birakandagirwa abitwa ko bacyekwa bagatabwa muri yombi rimwe na rimwe usanga banarengana ubundi ituze rikagaruka amatangazo agatangwa mu binyamakuru ko amahoro yagarutse rubanda bagakoma amashyi bavuga ko ubutegetsi ko bwabashije kubarinda.

Ntabwo ari muri politiki gusa aya mayeri akora no mu buryo bw’ubukungu aya mayeri arakoreshwa aha rubanda bemezwa uburyo igihugu kiri mu bihe bikomeye cyane bakabwirwa ko ubukungu bwagabanutse ko amikoro ya leta yagabanutse bitewe wenda no kunyerezwa kw’imisoro n’ibindi bitandukanye ubundi hakabo kuvanwaho kwa bimwe mu bikorwa leta yajyeneraga abaturage harimo nko kwishyurira abanyeshuri amashuri yisumbuye ( bourse ) aho leta yagiraga uruhare nko mu bikorwa byo kwivuza bikavanwaho abaturage bakigishwa kwigomwa no kwirwanaho ibi byorohera leta kubyumvisha rubanda ntibaboneko ari politiki.

3.Gutegura abaturage ku mpinduka zigamije kubumvisha ibyemezo birebana na politiki.

Ubusanzwe bizwi neza ko kubyumva byagorana bitewe n’uko bari basanzwe babaho cyangwa bamenyereye Ibyemezo uzi neza ko rubanda batapfa kwakira ubibateguza mbere y’igihe,ko wenda nko mu gihe kizaza bizashyirwa mu bikorwa nko mu myaka icumi iri mbere. Ku muntu biroroha kwakira impinduka zizaba mu gihe kiri imbere kurusha uko wabimubwira bizaba vuba.

4.Kugumisha rubanda mu bujiji bagahugira ku bumenyi budafite icyo bubamariye nk’imyidagaduro kwishimisha n’ibindi bidafite akamaro kanini kugeza ubwo ikinyuranyo cy’ubumenyi hagati ya rubanda rusanzwe n’ubutegetsi kiba kinini.

Urugero : Mu bihugu byinshi by’Afurika amakuru y’imikino yamamajwe mu binyamakuru hose rubanda barabyigishwa kugeza aho kuva mu bwongereza kugera mu bihugu bito nka Lesotho mu byiciro by’imyaka yose usanga umuntu ufite nk’imyaka mirongo itanu ufite n’impamyabumenyi y’ikirenga mu bintu runaka azi neza amakuru ajyanye n’ikipe afana yo mu Bwongereza abizi kimwe n’umwana w’imyaka 18 w’umukozi wo mu rugo bukaba ubumenyi basangiye ntawurusha undi bazi nk’imyaka y’umukinnyi , amafaranga afite kandi nta nyungu n’imwe babifitemo byose binyujijwe mu bitangazamakuru.

Iyi ni politike kuko nta n’ahandi rubanda babimenyera atari mu itangazamakuru naho amakuru ajyanye n’’ibyo bakeneye mu mibereho ya buri munsi n’iterambere aba afite umwanya muto cyane kandi ahubwo bamwe nta n’icyo aba ababwiye kinini nibyo baba baratojwe.

Urwo ni urugero rumwe ubundi hakaza imiziki n’ibyamamare impaka zikaba impaka bakirirwa muri ibyo nkaho kwidagadura aribyo bakeneye kurusha ibindi.

5.Kwereka rubanda ko ibibazo byose bafite aribo banyirabayazana ubwabo.

Abanyapolitike iyi iturufu bakoresha mu kugaragaza ubugira neza bwabo ko nta cyo baba batakoze kugirango rubanda babeho neza,rwose ko barara amajoro bitaye ku mutekano w’abaturage babo ....ko ahubwo ubushake bucye , n’ubunebwe aribyo bituma bahora mu bukene bwabaye karande.

ibi bifite akamaro gakomeye muri politiki kuko bituma rubanda baba mubyo kwishinja bikarangira biyumvisha ko batazi gukora ibi bikaza gutuma ibyo kwivumbura cg kwigaragabya biburizwamo bakumva ko aribo bananiwe gukora ko leta ntako iba itagize.

Muri politic utazi ibyo rubanda batekereza ku bikorwa byawe ibyo batekereza ngicyo igihe ubutegetsi bwawe buba bwananiwe.\

Uretse ibi mu mvugo z’abanya politiki hari ubundi buryo bwo gutuma rubanda bemeranywa neza neza n’ibyo ubabwira hatitawe mu kuvuga niba aribyo cyangwa ataribyo.

1.Ubwoba : gukoresha amagambo atera ubwoba abaturage kugirango bumve ko ibikuba byacitse kugira ngo bashyigikire ibyemezo by’ubutegetsi .

Urugero : Joseph Goderi umwe mu nkoramutima za Adolf Hitler rimwe yaravuze ati " Ntakundi Ubudage bugiye gutsindwa burundu" Aha yashakaga kubwira ko Abadage bagomba guhaguruka bakarwanira igihugu.

2. Iyo umutegetsi runaka abwira abaturage agahora asubiramo ngo "nkuko nyakubahwa runaka ahora abivuga , nkuko Nyakubahwa runaka abigenza,” ubu ntabwo ari ubuswa ku munyapolitiki uvuga muri ubu buryo ni politike yo gushimangira ibyo avuga no kubiha agaciro kurusha wenda ako we yari kubiha ni nko kuvuga ngo "niba mugirango ndababeshya nyamara mumenyeko na nyakubahwa runaka iyo aza kuba ari ahangaha nawe yari kubibabwira" cyangwa" sijye jyenyine uvuga ibi na wawundi mutinya cyangwa se mukunda iyo aza kuba ahari niko yari kubivuga.

3. Ubuhamya : ibi bikorwa hafatwa umwe mubaturage wagize intambwe atera kubera politike y’uwo muyobozi ibi byorohera abaturage kubyumva iyo ari mugenzi wabo ubivuga cyangwa bagakoresha undi muntu uzwi cyane mu gihugu.

4. Aha abanya politike bahindura amwe mu mateka cyangwa se bagahimba amwe mu majanisha bigamije kuyobya rubanda. Nk’urugero bakavuga ngo mu mwaka ushize miliyoni y’abaturage yivanye mu bukene ushingiye wenda ku kigeraranyo cyakozwe na minisitri runaka.

5.Gufata uwakoze ibyaha ukabishyira ku wundi kunyungu za politike.

Habaho amayeri menshi abanya politiki bifashisha mu kwemeza rubanda no gukora ku buryo ubutegesti bushyigikirwa no kubumvisha ko ari ndashyikirwa. Ibi ni bimwe mu byo twabateguriye ariko hari n’ibindi nawe uzi bibera mu bihugu binyuranye by’isi wabisangiza abandi.

By Nzengimana Theoneste





Tanga igitekerezo kuri iyi nkuru



Igitekerezo