Imyanzuro 10 yafatiwe mu nama y’Igihugu y’Umushyikirano yabaga ku nshuro ya 16

Inama y’Igihugu y’Umushyikirano ya 16 yateraniye muri Kigali Convention Centre ku wa 13-14 Ukuboza 2018, yafatiwemo imyanzuro 10 igaruka ku nzego zitandukanye z’ubuzima bw’igihugu.

Uyu mushyikirano witabiriwe n’abantu barenga ibihumbi 2000 baturutse imihanda yose, baba abari mu gihugu ndetse n’abaturutse hanze yacyo hakiyongeraho n’abandi bayikurikiranaga kuri radio na Televiziyo by’igihugu bari mu ntara enye zigize igihugu.

Imyanzuro 10 yafatiwemo ni iyi:

1. Kuvugurura imitangire n’imicungire y’inguzanyo zihabwa abatishoboye zinyuzwa mu Umurenge Sacco kugira ngo zibafashe kwivana mu bukene vuba no kwigira.

2. Kunoza imikorere y’Umurenge Sacco muri rusange kugira ngo irusheho kugera ku ntego yashyiriweho no gufata ingamba zo kwishyuza vuba abayambuye.

3. Gukomeza kunoza ingamba zigamije kuzamura imibereho myiza y’abaturage no kongera kureba uburyo abari mu cyiciro cya kabiri cy’ubudehe bakongera kwemererwa gukora imirimo ihemberwa itangwa muri gahunda ya VUP.

4. Kongera ubuhunikiro bw’ibiribwa n’urutonde rw’ibyo igihugu gishobora guhunika mu rwego rwo kwihaza, kandi hakanozwa imikorere y’isoko ry’ibicuruzwa by’ibanze.

5. Guhuza igenamigambi n’ishyirwa mu bikorwa mu nzego zose bireba hagamijwe kwihutisha gukemura ikibazo cy’imirire mibi n’igwingira ry’abana.

6. Gufata ingamba zo gukuraho imbogamizi zikibangamira ireme ry’uburezi mu byiciro byose uhereye ku mashuri abanza, ayisumbuye ndetse n’amakuru.

7. Gukomeza gushishikariza abanyarwanda gukunda no gukoresha ibikorerwa mu Rwanda, kongera ubwiza n’ubwinshi bwabyo no gufata ingamba zituma ibiciro byabyo bibasha guhangana n’ibituruka hanze.

8. Kurushaho kwigisha urubyiruko amateka ya Jenoside no kongera imbaraga mu kurutoza kurangwa n’indangagaciro z’umuco nyarwanda( abanyeshuri , urubyiruko rwo muri diaspora…)

9. Gukomeza kubungabunga inzibutso n’ibimenyetso bya Jenoside no gukemura ibibazo abacitse ku icumu rya Jenoside bagihura nabyo birimo ihungabana.

10. Kwihutisha ishyirwa mu bikorwa rya gahunda y’igihugu yo kwizigamira y’igihe kirekire (Ejo Heza) no gukangurira abanyarwanda b’ingeri zose kuyitabira.

PNG - 1 Mb
Perezida Kagame na Madamu Jeannette Kagame ubwo bitabiriye umunsi wa kabiri w’Inama y’Igihugu y’Umushyikirano
PNG - 1.1 Mb
Inama y’Igihugu y’Umushyikirano yabaga ku nshuro yayo ya 16 yitabiriwe n’abantu barenga ibihumbi 2000 baturutse imihanda yose


@Umubavu.com





Tanga igitekerezo kuri iyi nkuru



Igitekerezo