Ubuzima busharira umuhanzi Cyamika ’Biremera’ yanyuzemo burimo no guhingira amafaranga

Umuhanzi Nyarwanda uririmba indirimbo zo kuramya no guhimbaza Imana (Gospels), Eric Cyamika uzwi nka ’Biremera’, avuga ko kugera aho ageze ubu yanyuze mu buzima bukomeye burimo no guhingira amafaranga.

Mu buhamya bwe, Eric Cyamika uvuka mu Karere ka Ngororero (ubu aba i Kigali) avuga uburyo yavuye iwabo akajya kuba I Rwamagana mbere yo kuza I Kigali, urugendo narwo avuga ko rutari rworoshye ashingiye ku muntu yahaye amafaranga ngo amugurire imashini yo kudoda bikarangia ayamuriye, ari nayo yabaye intandaro yo guhingira amafaranga ngo yishyure umwenda yari asigayemo.

Avuga ko no kubona uwo ahingira byari bikomeye kuko bamurebaga bakabona ari umwana, ngo yabasabaga imbabazi ko bamufasha bakamuha akazi ariko banakamuha bakamuhemba 200Frws mu gihe umukuru yahembwaga 500 Frws.

Avuga ko ubuzima bwakomeje kwisunika akaza gutangira kogosha akoresheje imashini y’intoki (hari abayita Nyonganyonga), nyuma ashinga Salon, umufotozi, Resitora agenda azamuka.

Avuga ko nyuma yo kugenda azamuka asezera ubukene, ari bwo impano y’ubuhanzi yatangiye kuyibyutsa ari bwo yanaje i Kigali gukora indirimbo nk’umuhanzi.

Yavuze uburyo yahawe indirimbo aho yasengeraga bikamunanira gucomeka ibyuma, yanagira ngo aririmbe indirimbo akayibura, Abakirisitu ari ko bamukwena, byatumye yongera kuzima kubera iki gisebo.

Cyamika avuga ko nubwo yacaga muri ibi byose, yasengaga Imana ikamubwira ko izamugirira neza kandi ko ari yo yavuganye na we.

Ubu tuvugana, Eric Cyamika cyangwa se ’Biremera’ ni umwe mu bahanzi ba Gospel bihagazeho mu Rwanda kuko afite indirimbo nyinshi z’amajwi n’amashusho zirimo n’iyamwitiriwe yise ’Biremera’ yakunzwe na benshi.

Umva muri Video birambuye ubuhamya bwa Eric Cyamika:

@Umubavu.com





Tanga igitekerezo kuri iyi nkuru



Igitekerezo