Ubushinjacyaha bwajuririye icyemezo cyo kugira umwere Umuvugizi wungirije wa ADEPR

Ubushinjacyaha bwajuririye icyemezo cy’Urukiko rwisumbuye rwa Nyarugenge, cyo kugira umwere Umuvugizi wungirije wa ADEPR, Rev. Karangwa John, ku byaha yari akurikiranyweho byo gukoresha inyandiko mpimbano.

Umuvugizi w’Ubushinjacyaha bw’u Rwanda, Faustin Nkusi, yabwiye IGIHE dukesha iyi nkuru ati “Nibyo dosiye yarajuririwe mu Rukiko Rukuru’.

Iki kinyamakuru kivuga ko gifite amakuru ko ubu bujurire bw’ubushinjacyaha bwatanzwe tariki 14 Nyakanga 2020.

Ku wa 30 Kamena 2020 nibwo Urukiko Rwisumbuye rwa Nyarugenge, rwemeje ko ari Karangwa ari umwere nyuma y’amezi umunani afunzwe akurikiranyweho ibyaha byo gukoresha inyandiko mpimbano.

Rev. Karangwa yatawe muri yombi mu Ukwakira 2019. Yashinjwaga icyaha cyo gukoresha inyandiko mpimbano, igihe yiyamamarizaga umwanya w’Umuvugizi wungirije muri ADEPR, kuko byasabaga ko uwiyamamariza uwo mwanya agomba kuba afite Impamyabumenyi yo ku rwego rwa (Bachelor’s).

Icyo gihe yatanze impamyabumenyi yo muri Philippines n’iyo muri Uganda, biza gukekwa ko ari impimbano atigeze ahiga, bituma atabwa muri yombi ngo hakorwe iperereza akurikiranweho icyaha cyo gukoresha inyandiko mpimbano.

Mu iburanisha ryo ku wa 10 Kamena 2020, Ubushinjacyaha bwari bwasabye urukiko ko Rev Karangwa, yafungwa imyaka irindwi agatanga ihazabu ya miliyoni 5 Frw, kubera icyaha cyo gukoresha inyandiko mpimbano.

Ubwo umucamanza mu Rukiko Rwisumbuye yasomaga urubanza ku wa 30 Kamena 2020, yavuze ko urukiko “Rwemeje ko nta bimenyetso simusiga bihamya Karangwa John icyaha cyo gukora no gukoresha inyandiko mpimbano. Rukijije ko Karangwa John atsinze.’’

Ubwo Rev Karangwa yatabwaga muri yombi, impamyabumenyi ze zasakaye mu itangazamakuru zibajijweho cyane kubera impamvu zitandukanye aho ‘nta nimero ziziranga zifite nk’uko bikorwa ku zindi mpamyabumenyi za kaminuza’. Ikindi zirimo kunyuranya ku myandikire y’amazina ya nyirazo aho iyo muri Uganda ari ‘Kalangwa’ naho iyo muri Philippines akaba ‘Karangwa’.

Ku mpamyabumenyi yo muri Philippines, igituma abantu bayigiraho impungenge kandi ni uko iriho icyiciro ‘Title ya Révérend’ (Rev. Pastor Karangwa John) kandi mu rwego rw’ibijyanye n’imyigire nta mpamyabumenyi ijyaho urwego rw’akazi kuko atari izina ry’umuntu.

Ubushinjacyaha bushingiye kuri izi mpungenge, bwasabye Inama Nkuru y’Amashuri Makuru na za Kaminuza (HEC), kwandikira abashinzwe amashuri makuru na za Kaminuza muri Uganda na Philippines aho Karangwa avuga ko yize ngo hamenyekane umwimerere w’impamyabumenyi ze.

Nk’uko bigaragara mu ibaruwa HEC yandikiye Ubushinjacyaha ku wa 12 Ukuboza 2019, yavuze ko ishingiye ku bisubizo byavuye mu Nama y’Igihugu ishinzwe Amashuri makuru na za Kaminuza muri Uganda, ishuri Karangwa avuga ko yizeho ntariba muri Uganda.

HEC igira iti “Dushingiye ku makuru yatanzwe n’Inama y’Igihugu ishinzwe Amashuri Makuru na za Kaminuza muri Uganda, Kampala School of Theology ntabwo ibaho. Ishuri rizwi ni Kampala Evangelical School of Theology. Ku bw’ibyo, ntabwo twahamya ko impamyabumenyi ya Bibiliya na Tewolojiya ari umwimerere mu gihe ishuri ubwaryo ritabaho muri Uganda.”

Hari kandi igisubizo cyavuye muri Philippines Association of Colleges and Universities Commission, nacyo cyemeza ko ishuri Karangwa John, avuga ko yizeho rya Farcorners International Theological Seminary, ritaba mu mashuri yo muri Philippines.

Ibi bimenyetso Ubushinjacyaha bwabigarutseho mu iburanisha ryo ku wa 10 Kamena 2020, bubishingiraho busaba ko Karangwa afungwa imyaka irindwi agatanga n’ihazabu ya miliyoni 5 Frw.

Mu iburanisha Karangwa yahakanye ibyo aregwa avuga ko yize muri Philippines, agaragaza ibimenyetso birimo amazina n’ifoto yabo biganye yakuye kuri Google.

Ubushinjacyaha bwasabye ko ibyo bimenyetso bitakwemerwa kuko nta rwego rubifitiye ububasha bwabitanze.

Hari amakuru avuga ko Karangwa yasubijwe mu nshingano ze nk’Umuvugizi wungirije wa ADEPR ndetse yaba agiye guhabwa imishahara y’amezi umunani yamaze afunzwe ingana hafi miliyoni 29Frw.

Umuvugizi wa ADEPR Rev Karuranga Ephrem ntacyo aratangaza kuri aya makuru.


Ubushinjacyaha bwajuririye Urukiko Rukuru ku cyemezo cyo kugira umwere Umuvugizi wungirije wa ADEPR, Rev Karangwa warekuwe n’Urukiko Rwisumbuye rwa Nyarugenge ku wa 30 Kamena 2020

Iyo utitaye kuri Politike yo ikwitaho//Umuvugizi wa DALFA Umurinzi arabivuze byose muri iyi Video utapfa gusanga ahandi:





Tanga igitekerezo kuri iyi nkuru



Igitekerezo
kbs Kuya 16-07-2020

oya nibafunge uwomutekamutwe