Rev Karangwa wari Umuvugizi wungirije wa ADEPR yagizwe umwere mu bujurire

Rev Karangwa John wigeze kuba Umuvugizi wungirije mu Itorero ADEPR yagizwe umwere ku bujurire bw’Ubushinjacyaha ku byaha byo gukoresha inyandiko mpimbano yashinjwaga.

Rev. Karangwa yatawe muri yombi mu Ukwakira 2019 ashinjwa icyaha cyo gukoresha inyandiko mpimbano igihe yiyamamarizaga umwanya w’Umuvugizi wungirije muri ADEPR mu 2017, kuko byasabaga ko uwiyamamariza uwo mwanya agomba kuba afite Impamyabumenyi yo ku rwego rwa (Bachelor’s).

Icyo gihe yatanze impamyabumenyi yo muri Philippines n’iyo muri Uganda, biza gukekwa ko ari impimbano atigeze ahiga, bituma atabwa muri yombi ngo hakorwe iperereza.

Rev Karangwa yahakanye ibyo aregwa avuga ko yize muri Philippines, agaragaza ibimenyetso birimo amazina n’ifoto y’abo biganye yakuye kuri Google.

Ubushinjacyaha bwasabye ko ibyo bimenyetso bitakwemerwa kuko nta rwego rubifitiye ububasha bwabitanze.

Mu iburanisha ryo ku wa 10 Kamena 2020, Ubushinjacyaha bwasabye urukiko ko Rev Karangwa yafungwa imyaka irindwi agatanga n’ihazabu ya miliyoni 5 Frw.

Ku wa 30 Kamena 2020, Urukiko Rwisumbuye rwa Nyarugenge, rwemeje ko Rev Karangwa ari ‘umwere’.

Ubwo umucamanza mu Rukiko Rwisumbuye yasomaga imyanzuro yavuze ko urukiko “Rwemeje ko nta bimenyetso simusiga bihamya Karangwa John icyaha cyo gukora no gukoresha inyandiko mpimbano. Rukijije ko Karangwa John atsinze.’’

Uyu mwanzuro ukimara gutangazwa, Ubushinjacyaha bwahise buwujururira buvuga ko butanyuzwe na wo.

Icyo gihe Rev Karangwa wari umaze amezi umunani afungiye muri Gereza ya Nyarugenge iri i Mageragere, yarafunguwe ndetse akomeza inshingano ze muri ADEPR.

Ku wa 31 Ukuboza 2020 nibwo Urukiko Rukuru ruri Nyamirambo rwashimangiye umwanzuro w’Urukiko Rwisumbuye rwa Nyarugenge ko Rev Karangwa ari umwere.

Rev. Karangwa ntiyitabiriye isomwa ry’uru rubanza ariko bamwe mu bagize umuryango we bari mu rukiko utangazwa.

Rev Karangwa kimwe na Biro Nyobozi yose yabarizwagamo yari iyobowe na Rev. Karuranga Euphrem nk’Umuvugizi w’Itorero rya ADEPR, baheruka gukurwa ku buyobozi mu mpinduka zakozwe n’Urwego rw’Igihugu rw’Imiyoborere, RGB ruvuga ko ngo zigamije guha itorero icyerekezo gishya.


Rev Karangwa John washinjwaga gukoresha inyandiko mpimbano yagizwe umwere

IBIKUBIYE MU GITABO CYANDITSWE NA APOTRE MUTABAZI YISE "NKUGIRE INAMA MUYOBOZI":





Tanga igitekerezo kuri iyi nkuru



Igitekerezo