Bitunguranye Bishop Rugagi yafunguwe

Nyuma y’ibyumweru bigera kuri bibiri afunze, umuyobozi wa Redeemed Gospel Church Rwanda, Bishop Rugagi, wari ukurikiranyweho icyaha cyo gukoresha inama mu buryo bunyuranyije n’amategeko no kurwanya ububasha bw’amategeko yarekuwe, ibintu byaje bitunguranye nyuma yuko ubushinjacyaha bwari bwamaze gushyikirizwa dosiye z’abo bari bafunganywe bose.

Ubwo yatabwaga muri yombi mu ntangiriro za Werurwe 2018, Polisi y’Igihugu yatangaje ko ari mu Bapasiteri bashatse kubangamira gahunda yo kugenzura insengero zitujuje ibisabwa bakoresha inama zitemewe mu bice bitandukanye.

Inkuru y’ifungurwa rya Rugagi yamenyekanye ku mugoroba wo kuri uyu wa Kane, tariki ya 15 Werurwe 2018; amakuru IGIHE ikesha bamwe mu nkoramutima za hafi za Bishop Rugagi ni uko akimara kurekurwa yabandikiye ubutumwa ashima Imana ko yafunguwe. Bugira buti “Yesu ashimwe! Amahoro y’Imana abane namwe. Narekuwe.”

Ubushinjacyaha Bukuru bwaherukaga gutangariza IGIHE ko ku wa 12 Werurwe 2018, bwashyikirijwe dosiye iregwamo Bishop Rugagi Innocent, Apôtre Rwandamura Charles, R. Pasiteri Nyamurangwa Fred, Bishop Rugagi, Rev. Ntambara Emmanuel, Pasiteri Dura James na Pasiteri Kalisa Shyaka Emmanuel.

Gusa kugeza ubu nta rwego rwa Leta ruremeza amakuru y’ifungurwa rya Bishop Rugagi n’impamvu yaba yarekuwe dore ko ubushinjacyaha bwari bwamaze gushyikirizwa dosiye z’abapasiteri bose bafunzwe.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
-xxxx- Kuya 16-03-2018

Imana ishimwe