Imyaka 100 irihiritse umunyarwandakazi wa mbere mu Rwanda yiyeguriye Imana

Kuva mu mwaka w’1919, imyaka ijana irashize umunyarwandakazi wa mbere mu Rwanda yiyeguriye Imana. Iyi Yubile yizihirijwe muri Paruwasi ya Rwaza, mu Karere ka Musanze, Intara y’Amajyaruguru aho Mama Mariya Yohana NYIRABAYOVU w’i Kabgayi, umunyarwandakazi wo mu muryango w’Abenebikira wa mbere yasezeraniye.

Mu butumwa bw’Umwepiskopi wa Diyosezi ya Ruhengeri, Nyiricyubahiro Musenyeri Visenti Harolimana yashimye uruhare umuryango w’Abenebikira wagize mu iterambere rya Kiliziya Gatolika n’igihugu muri rusange. Yahamagariye ababikira bari mu muryango w’Abenebikira gukomeza kurangwa no kumvira ijwi ry’Imana; kudakora nk’ab’isi; guhamya ineza y’Imana mu bantu no kubafasha kumenya Imana. Yabararikiye gukomeza kuba intangarugero.

Nyiricyubahiro yagize ati: "Abenebikira, Imana yashatse ko umuryango wanyu uba umuryango wa mbere w’Abihayimana mu Rwanda wakira abanyarwandakazi. Ni ukuvuga ko muri imfura z’indi miryango. Ndasaba rwose ko Abenebikira mukomeza kuba intangarugero kandi mufite aho mushingira, ku mateka y’imyaka 100 y’ubutumwa. Mushingire kuri ayo mateka meza kandi maremare y’ubutorwe n’ubutumwa, maze mufashe abantu kumenya ubwiza bwo kwiyegurira Imana. Mufashe imiryango ikivuka.

Mukomeze kuba abantu bunze ubumwe na Yezu Kristu babereyeho kumukorera, bakorera n’abavandimwe. Imana yabakoreye ibitangaza bavandimwe Benebikira! Imana yabakoreye ibitangaza byinshi, musubije amaso inyuma mu buzima bwanyu, Imana yabakoreye ibitangaza byinshi. Mukomeze rero kuba nka Petero, Yakobo na Yohani twumvise mu Ivanjili. Babonye ubwiza bw’Imana, berekwa ikuzo rya Yezu ariko bumva n’ijwi ry’ubuhamya.

Maze namwe ubwanyu, buri gihe mu butumwa bwanyu mufashe abantu kugira ngo bamenye ibyiza, bakire ingabire zo kuba Abakristu, bashobore kujya mbere mu bukristu bwabo ndetse habonekemo benshi kandi beza biyegurira Imana. Kuko kwiyegurira Imana ni ingabire ikomeye tugomba kwakiriza yombi.

Ndifuriza Yubile nziza Umuryango w’Ababikira, Benebikira Yubile nziza! Yubile izarangwa n’imbuto nyinshi z’ibyishimo n’imbaraga nshya kugira ngo mutangire neza ikinyejana gikurikiyeho mukomejwe no kumva ko mufite Imana, Umubyeyi Yezu Kristu ubahamagara kandi ubatuma kandi akaba indahemuka".

Mama Mariya Sylviya Twagirayezu uvuka muri iyi Paruwasi ya Rwaza akorera ubutumwa muri Paruwasi ya Nyamasheke i Cyangugu yatangaje ko icyamuteye umugambi wo kwiha Imana ari ibikorwa yabonanye ababibira b’Abenebikira nawe yiyemeza kwiha Imana agamije gufatanya nabo ibyo bikorwa by’urukundo birimo ibyo kwigisha Ivanjili, ubuvuzi, uburezi n’ibindi.

Mama Edmond ni umubikira ufite imyaka 95 yishimiye umuhamagaro wo kwiha Imana ikanamuha gufasha abandi asaba abakiri bato gukorera Imana mu muhamagaro barimo. Yahamagariye urubyiruko rwiyumvamo umuhamagaro wo kwiha Imana kwemera kwitaba ijwi ryayo. Asaba urubyiruko rwiyumvamo umuhamagaro wo kuzubaka ingo kurangwa n’indangagaciro y’urukundo mu ngo zabo.

Umukuru w’umuryango w’Abenebikira, Mama Thierri Dominique yishimiye imbuto uyu muryango weze mu myaka 100 bamaze bashinzwe. Yagaragaje ko intego yabo ari ukogeza Ivanjili ya Yezu Kristu mu bantu.

Umuryango w’ababikira b’Abenebikira ubarurirwamo Ababikira 356 bari mu bihugu binyuranye birimo u Rwanda, u Burundi, Uganda, Kenya na Repubulika Iharanira Demukarasi ya Congo.

JPEG - 1.2 Mb
Imyaka 100 irashize umunyarwandakazi wa mbere mu Rwanda yiyeguriye Imana

NYIRANDIKUBWIMANA Marie Goretti





Tanga igitekerezo kuri iyi nkuru



Igitekerezo
Titi Kuya 14-08-2019

Nyagasani wabahamagaye namwe mukumva ijwi rye, ni asingizwe. Namwe kandi mwarakoze kuvuga Yego. Ni akomeze yuhire imbuto mwabibye kandi zikwire isi yose.

umutesi Kuya 19-03-2019

Bari ba Bikira Mariya "BENEBIKIRA " yubile nziza .
Imana iragahora isingizwa ubu n`iteka ryose