Ibya Pasiteri Zigirinshuti na ADEPR ivuga ko yamwirukanye ku kazi bigeze he?

Ku wa 14 Werurwe 2018 nibwo Itorero rya Pantekote mu Rwanda (ADEPR) ryashyikirije Pasiteri Zigirinshuti Michel wari ukuriye ivugabutumwa n’amahugurwa muri ryo ibaruwa imuhagarika ku kazi, rivuga ko azira guta akazi atabimenyesheje ubuyobozi ingingo atemeranyijweho n’ubu buyobozi avuga ko yari yanditse ibaruwa ibibumenyesha.

Ubwo aya makuru yamenyekanaga, Pasiteri Zigirinshuti Michel yatangarije itangazamakuru ko atataye akazi, ahubwo yari yaragiye mu rugendo rw’ivugabutumwa kandi ko abamuyobora bari babizi.

Mu magambo ye yagize ati “Ibaruwa intumira yanyuze ku Muvugizi w’Itorero, Umuvugizi wungirije nawe narabimumenyesheje.”

Yakomeje avuga ko yatunguwe no kwirukanwa mu kazi ari mu rugendo rw’ivugabutumwa.

Umubavu.com twashatse kumenya nyirizina niba koko byararangiye iyirukanwa rya Pasiteri Zigirinshuti Michel ribaye impamo maze tuvugana nawe ku murongo wa Telefoni igendanwa.

Yagize ati “ Hari abanditse ngo narahagaritswe ariko sibyo ahubwo nirukanywe burundu mu kazi kange gasanzwe nakoraga muri Biro ya ADEPR ariko inshingano zange za Gipasiteri ndazikomeje, ndi umukristu, nta cyaha cy’umutima naguyemo”.

Yakomeje agira ati “ubundi twebwe muri ADEPR iyo tuvuze ijambo bita guhagarika ni “Kutenga mu Giswahili”, icyo gihe umuntu aba aciwe mu itorero cyangwa ahagarikiwe ibyaha runaka mu gihe gewe nirukanywe mu kazi gasanzwe nakoraga ariko inshingano za gipasiteri ndazikomeje rwose”.

PNG - 700 kb
Pasiteri Zigirinshuti avuga ko ADEPR yamwirukanye mu kazi gasanzwe yakoraga mu itorero ariko akaba agikomeje inshingano za Gipasiteri nkuko bisanzwe


Pasiteri Zigirinshuti Michel yakuyeho urujijo rw’abavugaga ko yahagaritswe kandi nyamara yarirukanywe burundu mu kazi yakoraga mu itorero ko kuba ariwe wari ukuriye ivugabutumwa n’amahugurwa muri ADEPR.

Nyuma yo kuvugana na Pasiteri Zigirinshuti Michel, twashatse kumenya icyo ubuyobozi bw’Itorero rya Pantekote mu Rwanda (ADEPR) bubivugaho niba uyu mupasiteri azasubizwa mu kazi cyangwa yarahagaritswe burundu koko nkuko byibazwa maze tuvugana n’umuvugizi, Rev. Karuranga Ephrem.

Abajijwe niba Pasiteri Zigirinshuti yarahagaritswe burundu mu mirimo ye, mu magambo ye yagize ati“ nta kazi yasubijwemo twaramuhagaritse rwose”.

Abajijwe kandi niba hari gahunda yo kumusubiza mu kazi cyane ko ijambo guhagarika rivuga ko igihe icyo aricyo cyose umuntu ashobora gusubizwa mu mirimo yakoraga, umuvugizi wa ADEPR yagize ati “byaterwa nuko amategeko y’akazi abiteganya ariko kugeza ubu aracyahagaritse”.

PNG - 671.6 kb
Rev Karuranga Ephrem avuga ko Pasiteri Zigirinshuti yasubizwa mu kazi bitewe nuko amategeko abiteganya


Nyuma yuko Pasiteri Zigirinshuti umaze imyaka isaga 35 mu ivugabutumwa yirukanwe mu kazi, yari yatangaje ko ubuyobozi bwa ADEPR bwari bumaze imyaka isaga ibiri bwaramwangiye gukora insgingano ze.

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo
Emmanuel Kuya 9-05-2018

Impinduka buri gihe zitera ibibazo

kuba rero zigirinshuti yahagarikwa mukazi ka bureau sigikuba gicitse kuko nkeka yarahamagariwe kuvuga gukomera kw’Imana( ivugabutumwa)

impano imurimo ntawayimukuyemo balukuyeho icyubahiro cyisi gusa

Niyiturize Uwiteka azi impamvu

tuyishime jean baptiste Kuya 9-05-2018

uwo mugabo niba nta cyaha yaguyemo ababishinzwe babyigaho agasubizwa akz kuko IMANA yamuhaye impano kandi arakora pe

tuyishime jean baptiste Kuya 9-05-2018

uwo mugabo niba nta cyaha yaguyemo ababishinzwe babyigaho agasubizwa akz kuko IMANA yamuhaye impano kandi arakora pe

hamed niyo Kuya 8-05-2018

Yoooo! Michel koko adepr ibyigeho neza kuko nimukozi w’Imana.

Nkundimana theogene Kuya 8-05-2018

Zigirincuti ni umukozi twemera kuko ivugabutumwa amaze gukora ryagize umumaro, abantu benshi bakiriye agakiza .