Abayoboke ba Bishop Rugagi mu ihurizo nyuma yuko yigiriye muri Kenya

Nyuma yuko ku itariki ya 12 Gashyantare 2018, ubuyobozi bw’Umujyi wa Kigali n’Akarere ka Nyarugenge bufashe icyemezo cyo gufunga urusengero rwa Bishop Rugagi kubera urusaku, uyu muvugabutumwa yahise yigendera mu gihugu cya Kenya dore ko itorero rye rihafite ishami riyobowe n’abavugabutumwa batandukanye barimo n’umuhungu we ibi bikaba byasize abasanzwe ari abayoboke mu ihurizo rikomeye cyane ko kuri iki Cyumweru bagiye gusenga bagatungurwa no gusanga urusengero rudadiye n’ingufuri.

Kuri iki Cyumweru tariki 18 Gashyantare 2018, Bishop Rugagi Innocent, Umushumba w’Itorero Abacunguwe (Redeemed Gospel Church) yagiye mu gihugu cya Kenya aho afite ishami ry’itorero rye (Redeemed Gospel Church - Kenya) riyoborwa na REV. Joshua Katua, ndetse mu baribwirizamo hakaba harimo umuhungu we. Ubwo yajyaga muri iki gihugu, Bishop Rugagi yasize abayoboke b’itorero rye mu Rwanda bari mu cyeragati, dore ko bamwe bagiye gusengera aho urusengero rwabo ruherereye mu mujyi wa Kigali bagasanga hafunze bakitahira.

PNG - 864.1 kb
Bishop Rugagi n’umuhungu we w’umuvugabutumwa


Bishop Rugagi, kuri iki Cyumweru we yahise yerekeza muri Kenya aho afite irindi torero rya Redeemed Gospel Church - Kenya rinabarizwamo umuhungu we w’umuvugabutumwa witwa Imanishimwe Hesron. Ubwo yageraga muri Kenya agahita atangira no kubwiriza muri iri torero, yabanje gushima cyane umuhungu we avuga ko yabaye umuvugabutumwa mwiza.

PNG - 853.6 kb
Bishop Rugagi arimo kubwiriza mu itorero ryo muri Kenya aho agiye kumara iminsi
PNG - 837.8 kb
Bishop Rugagi n’umuhungu we w’umuvugabutumwa mu gihugu cya Kenya


Bishop Rugagi ati: "Uyu mwana yambereye umugisha kandi yakomeje kumpesha agaciro muri iki gihugu, namuzanye ari umwana muto none ubu yarashatse Imana yamuhaye n’umugisha w’urubyaro yaranabyibushye... Muhungu wanjye warakoze gukorera Imana ndetse no kunyubahisha muri iki gihugu, kandi uzagera kure cyane”.

Biteganyijwe ko Bishop Rugagi azamara igihe abwiriza muri uru rusengero rwo muri Kenya, mu gihe iby’urusengero rwe mu Rwanda bikomeje kubera amayobera abayoboke b’itorero rye. Ku wa Gatanu tariki 16 Gashyantare 2018, mu nama yahuye Abanyamadini n’inzego za Leta zitandukanye, Bishop Rugagi yavuze ko yafungiwe urusengero kubera impamvu z’urusaku kandi ngo yarabikemuye, aho yavugaga ko yakoresheje ibikoresho bigabanya urusaku bya miliyoni zikabakaba zirindwi, ariko ngo hari abantu ijambo ry’Imana rirya mu gutwi bashatse kumubeshyera bituma yongera gufungirwa.

Minisitiri w’Ubutegetsi bw’igihugu, Francis Kaboneka, yabwiye Bishop Rugagi ko bamwihanangirije bikomeye ndetse ko nibikomeza bazanamufungira harimo Abakirisitu. Nyuma yo kuvuga ibi, nta masaha menshi yashize, urusengero rwa Bishop Rugagi rwongere gufungwa n’ubuyobozi.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo