Abarisha iturufu y’ubuhanuzi buyobya abantu bahagurukiwe muri ADEPR

Ibi byatangajwe n’umuvugizi w’Itorero rya Pentecote mu Rwanda (ADEPR), Rev Karuranga Ephrem, avuga ko iri torero ryahagurukiye abiyambika umwambaro w’ubuhanuzi bakizeza abantu ko Imana ibazamuye, ibajyanye hanze ndetse izahabahera umugisha, ivugabutumwa agereranya no kuyobya Abakirisitu.

Rev Karuranga yavuze ko ikibazo cyugarije amadini n’amatorero arimo na ADEPR gishingiye ahanini ku butumwa buhabwa abayoboke bayo bubizeza ibitangaza rimwe na rimwe bidafite ishingiro.

Yagize ati “Turabyumva mu nsengero abahanura ngo Imana ikujyanye hanze, Imana irakuzamuye. Ibyo bintu rwose ni ukubica, umuntu akwiye gukunda igihugu cye Imana ikazamuzamurira mu Rwanda niba akunda igihugu cye; tubigishe ko Imana mu Rwanda ihari, amahirwe ahari.”

Yakomeje ati “Niba uri umuyobozi w’itorero ukaba wicaye ahantu umuntu agahanura ngo Imana ikujyanye hanze, Imana irakuzamuye byamaganire kure kuko ibyo ngibyo nibyo byica urubyiruko bakumva ko amahirwe ari hanze y’igihugu cyacu. Ahubwo amahirwe ari mu gihugu cyacu.”

Rev Karuranga, yavuze ko urubyiruko rwinshi rubeshywa ko Imana irujyanye hanze ngo niho izaruhera umugisha kandi atari byo.

Yagize ati “Imana isubiriza aho umuntu ari, igihugu cyacu Imana irakizi nacyo yakibazamuriramo. Ibintu byo kwigisha ngo izakuzamurira hanze, Imana iguhaye ibintu igize gute ntabwo twebwe tubyumva nka ADEPR mu by’ukuri ntabwo aribyo ntabwo ari ubuhanuzi. Ahubwo twumva ko niba uri Umunyarwanda Imana yakuzamurira mu Rwanda wakubaka mu Rwanda, ukagura imodoka ukayigurira mu Rwanda, ugafasha undi Munyarwanda.”

Yakomeje avuga ko abahanurira abantu ko Imana izabahera umugisha hanze, ari abashaka kwerekana ko mu Rwanda nta yihaba.

Ati “Icyo ngicyo kiba ari igitekerezo cyo kwerekana ko nta Mana iba mu Rwanda. Icyo rero ni igitekerezo kibi cyane mu myigishirize iri hanze aha ngaha nibyo rero twashaka kuvuga ko dukwiye kwigisha abana bacu ko amahirwe ahari mu Rwanda kandi ingero zirahari zifatika. Twashakaga kuvuga ko ibyo ngibyo twebwe tutabyemera nta bwo bikwiye kwigishwa ahantu aho ariho hose mu gihugu cyacu.”

Ubuhanuzi bufatwa nk’ intwaro y’Abapantekote (itorero ry’abanyamwuka) bitewe n’imyizerere yabo ndetse kwikoma abahanurira abantu ko bagiye kuzamurwa no kujya hanze bakahabonera umugisha bishobora kutazakirwa neza na bamwe.

Rev Karuranga avuga ko hazakoreshwa uburyo busanzwe bukoreshwa kugira ngo abayoboke ba ADEPR bumve neza ko hari ubuhanuzi bakwiye kwima amatwi.

Yagize ati “Itorero ryacu ni itorero ry’umwuka. Ubuhanuzi bujyana na Bibiliya […] Bibiliya iratubwira muri Zaburi ngo Imana izi ibyo amahanga yibwira nibyo amoko atekereza kuko Uwiteka ari we washyizeho ingabano z’ibihugu. Niba rero igihugu cyacu gifite urugabano rwacyo n’Imana ikaba ikizi ni byiza ko tukiyumvamo kandi Imana ikakiduheramo umugisha. Abayoboke bacu bazabyumva tuzakomeza kubabwira ko hari ubuhanuzi bakwiriye kwirinda.”

Umuvugizi wa ADEPR yavuze ko atahakana ko Imana yazamura umuntu ikamugirira neza, ariko ngo icyo badashaka ni ubuhanuzi buvuga ko Imana itazamurira umuntu mu Rwanda.

Yagize ati “Mu bigaragara rero ibyo bintu babigize iturufu yo kwangiza urubyiruko mu mutwe ndetse n’abakuze, bakumva ko nta cyiza kiri mu Rwanda kumva ko ntacyo Imana yahakorera, uwabyumva gutyo ntabwo yaba ari mu murongo muzima.”

Itorero rya ADEPR rigiye gushyira imbaraga mu gukomeza gushishikariza urubyiruko kuba maso no kwirinda abahanuzi bababwira ko mu mahanga ariho hari umugisha.

PNG - 766.7 kb
Umuvugizi wa ADEPR, Rev Karuranga, yavuze ko abayoboke b’itorero bazigishwa ko hari ubuhanuzi bakwiye kwima amatwi

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo
Baptiste TWIZEYIMANA Kuya 6-05-2018

Imana ishoboze abayobozi kandi ndabifuriza guhishurirwa numwuka wera w’Imana buri kimwe cyose cyakwangiza itorero.

Rugira Kuya 4-05-2018

Abatangabuhamya barahari ubwo Imana yabwiraga Kayiranga ngo agiye kuzamurwa mu ntera kdi yaraciriritse cyane none niwe utangiye guhakana ngo abahanuzi babirinde ndumiwe wose

Elie NGENDAHIMANA Kuya 4-05-2018

Andika Igitekerezo Hanno

umuvugizi wa Adepr Imana imuhe umugisha yamushyiriyeho ngo asane ibyangiritse byinshi byo muburyo bw’ umwuka. muri magufi kubyo yavuze nanjye ndumva bikwiye pe!

Turamusaba akomeze ahishurirwe kuko haracyari ibindi byinshi bidasobanutse nabyo tubyamagane, mwizina rya Yesu

Elie NGENDAHIMANA Kuya 4-05-2018

Andika Igitekerezo Hanno

umuvugizi wa Adepr Imana imuhe umugisha yamushyiriyeho ngo asane ibyangiritse byinshi byo muburyo bw’ umwuka. muri magufi kubyo yavuze nanjye ndumva bikwiye pe!

Turamusaba akomeze ahishurirwe kuko haracyari ibindi byinshi bidasobanutse nabyo tubyamagane, mwizina rya Yesu

KAMANZI Augustin Kuya 3-05-2018

Yewe, biteye ubwoba ahubwo! Bizi abamaze gusenya ingo kubera ubuhanuzi bubahanurira abantu ngo bafite amadayimoni, ....