Abapasitori barwaniye mu rusengero bapfa abayoboke babo rubura gica

Ni abagabo babiri b’abapasitori bo mu gihugu cya Kenya bafatanyije kuyobora itorero ryitwa African Pentecostal Church of Africa (AIPCA) ribarizwa mu gace ka Nyandarua barwanye inkundura bapfa abayoboke babo kuko buri umwe yashakaga kuba ari we uba umuyobozi bityo bikarangira bamwe mu bayoboke babo batanu nabo bakomerekeye muri iyi mirwano yabereye mu rusengero rw’iri torero.

Aba bagabo bombi batavuzwe amazina barwanye inkundura banakomeretsanya bikomeye kuri iki cyumweru tariki ya 21 Mutarama 2018, nyuma yuko buri wese yashakaga kuba ari we uyobora iri torero ryabo bityo abayoboke babo nabo basubiranamo bitewe n’uwo buri wese yiyumvamo si ukurwana karahava banangiza imwe mu mitungo y’iri torero yari mu rusengero.

PNG - 1.1 Mb
Aba ni bamwe mu bayoboke b’aba bagabo bari bahunze intambara


Polisi ikorera kuri station ya Ol-Kalou yamenye aya makuru niko gutabara isanga bakomeretse ku buryo bukomeye niko guhita ifasha abakomeretse kugera ku bitaro bya JM Memorial mbere yo gukurikiranwaho ibyaha birimo guteza imvururu mu baturage.

Umuvugizi w’Itorero rya AIPCA, Wahome Kamoche yavuze ko iri torero abereye umuvugizi ribaye rifunzwe mu gihe cy’agateganyo rikazongera gufungura imiryango hamaze kuboneka ugomba kuriyobora mu buryo busobanutse kandi bwemewe n’amategeko.

Amakuru dukesha Nairobi News akomeza avuga ko mu gihe iyi mirwano yadukaga, mu rusengero hinjiyemo insoresore bitamenyekanye aho ziturutse zigatangira guhondagura abari mu rusengero zitanaretse aba bapasitori barwanaga.

Imwe mu mitungo y’iri torero ifite agaciro k’ibihumbi yarahangirikiye ku buryo bukomeye ariko bamwe bakavuga ko iyi ntambara yari yateguwe n’umwe muri aba bapasitori agamije kwigarurira iri torero.

Umwe mu bageze kuri uru rusengero rwabereyemo iyi mirwano witwa Njeri yagize ati “twabanje kumva abantu basa nk’abaterana amagambo nyuma twumva bari kuririmba indirimbo zogeza imirwano. Hashize umwanya tuhageze twatangiye kubona abasore binjira batwaye ibiboko tutazi aho baturutse bigaragara ko umwe muri aba bapasitori yari yateguye iyi ntambara. Abantu batangiye guhunga bamwe baca mu muryango abandi mu madirishya buri wese bitewe n’ahamworoheye”.

Itorero rya African Pentecostal Church of Africa (AIPCA) bivugwa ko ryari risanzwe rifite ikibazo mu miyoborere yaryo yanagiye itera ibibazo mu mashami yaryo abarizwa hirya no hino mu gihugu cya Kenya.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo