Abadivantisite bo mu Bushinwa bahagurukiwe

Bikunze kugarukwaho na benshi ko isi igeze mu marembera yayo bitewe n’ibigenda byaduka bitigeze kubaho mu minsi yo hambere, gusa bamwe bakabyima amatwi dore ko nta n’icyo babikoraho uretse gusa gutegereza umunsi cyangwa kwiyegurira Imana nubwo na byo hari abakomeje kugenda babizizwa mu mpande zitandukanye z’iyi si dutuye.

Dusomye mu rwandiko rwa Kabiri Pawulo yandikiye Timoteyo igice cya Gatatu ku murongo wa Mbere (2Timoteyo 3:1), hagira hati "Umenye yuko mu minsi y’imperuka hazaza ibihe birushya".

Imyemerere ni kimwe mu bihuza abantu benshi muri iyi si, gusa uko iminsi igenda n’indi igataha hari ibihugu bigenda bibangamira amwe mu madini n’amatorero bitewe n’ibyo icyo gihugu gishyize imbere. Nta muntu utegetswe kugira imyemerere runaka. Buri wese ajya mu idini bitewe n’impamvu ze bwite.

Ikibazo cya Leta y’u Bushinwa n’Abadivantisite b’Umunsi wa Karindwi gikomeje kugenda gihindura isura kuko bamwe bari gufatwa abagafungwa, abandi bakabangamirwa mu gihe cy’amateraniro, hagakorwa amabarurwa ya hato na hato,…..

Abayobozi n’abapolisi babarirwa muri 200 baherutse kwinjira mur rusengero rw’abadive mu gihe cy’amateraniro bafata amafoto atandukanye aho buri mukirisitu yafotorwaga ukwe. Ntibyagarukiye aho kuko abayobozi basabye ko umuriro muri urwo rusengero bawukupa.

Bane muri abo bapolisi bafashe abakirisitu babiri hamwe na Pasiteri babasohora mu rusengero, babahata ibibazo, barabafunga gusa nyuma baza kubafungura.

Nyuma y’icyumweru kimwe ibi bibaye bongeye guterwa. Abayobozi ba Leta n’abapolisi bari benshi bafunga amarembo yinjira mu rusengero.

Aba bayobozi bangije byinshi mu bikoresho by’idini harimo aritari, intebe, ibikoresho by’umuziki, bibiliya n’ibindi nkuko Adventinformer.org ibitangaza.

Umwe mu bakirisitu yabwiye itangazamakuru ko Abadivantisite b’Umunsi wa Karindwi bahamagarwa n’abayobozi kuri Telephone bababwira ko nibatemera kureka imyemerere yabo bizabaviramo igihombo no kwicuza kudashira.
Bababwira ko igihe batavuye ku izima ngo bahagarike gusenga batazongera kwishyurira abana babo n’ababakomokaho, kuba bakwangiza ahazaza habo n’ibindi byinshi.

Nubwo Leta y’u Bushinwa isa n’iri kubangamira Abadivantisite, na bo ubwabo usanga basa n’abifitemo akavuyo muri iki gihugu aho nta shuri ryigisha abayobozi b’iri dini, kuba bafite amadini menshi ashamikiye ku badive (New Adventists,” “Wilderness Adventists,” and others),...

Si ubwa mbere leta y’u Bushinwa ikorera ibi Abadivantisite b’Umunsi wa Karindwi kuko kenshi abayoboke b’iri dini bafungwa mu buryo budasobanutse, bagakorerwa iyicarurozo ritandukanye.

Umwaka ushize, Pastor Zhu Zhongcai na bagenzi be 11 batawe muri yombi bakatirwa n’urukiko rwo mu gace ka Gong’an gaherereye mu mujyi wa Jingzhou. Aba bose uko ari 12 Leta yabashinjaga gukora ubucuruzi budakurikije amategeko, aho bari bafite inzu isohora ibitabo by’Ijambo ry’Imana bahaga abakirisitu bakabyifashisha mu gihe cy’amateraniro.

U Bushinwa bubarurwamo abayoboke b’idini ry’Abadivantisite b’Umunsi wa Karindwi babarirwa ku 455,683 mu gihugu gituwe n’abasaga miliyari.

Irebere na Video utapfa gusanga ahandi! Uyu mubyeyi ati "Tugiye kubona tubona umwana araje, yaje umugabo we yaramutemaguye!" Inzara na yo igiye kubica, babayeho mu buzima busharira:





Tanga igitekerezo kuri iyi nkuru



Igitekerezo