Internet ya 4G yongeye gushyirwa mu modoka zitwara abagenzi i Kigali

Nyuma y’igihe nta Internet iboneka mu modoka zitwara abagenzi mu Mujyi wa Kigali kandi abagenzi bayishyura, kuri ubu yongeye gushyirwamo.

Umunyamabanga wa Leta ushinzwe gutwara abantu n’ibintu, Uwihanganye Jean de Dieu, kuri uyu wa Kane, yatangaje ko 50 % by’imodoka zitwara abagenzi muri Kigali zamaze gushyirwamo internet ya 4G.

Mu 2015 nibwo imodoka za mbere zitwara abagenzi zashyizwemo internet yihuta ya 4G. Mu mwaka wakurikiyeho yashyizwe no mu zindi modoka zigera kuri 480, aho ku giciro cy’urugendo hariho n’icya internet.

Iyi internet yari yishimiwe na benshi ntiyarambye ku mpamvu zitandukanye zirimo kuba ikigo Telecom Network Solutions Provider Ltd, cyahawe kuyikwirakwiza cyarazanye ibikoresho bitagendanye n’igihe.

Muri Werurwe 2018, Urwego ngenzuramikorere (RURA) rwatangaje ko rwagiranye amasezerano yo gukwirakwiza internet mu modoka n’Ikigo AC Group gisanzwe gifite ikoranabuhanga ryifashishwa mu kwishyura amafaranga y’urugendo ukoresheje ikarita izwi nka Tap&Go.

Ubwo IGIHE yageraga muri gare yo mu Mujyi wa Kigali rwagati ahagana saa kumi z’umugoroba kuri uyu wa Kane, yasanze zimwe mu modoka zashyizweho utwuma (routers) dusakaza internet.

Utwo twuma turi ku ntebe iri imbere y’umuryango abagenzi binjiriramo (ku modoka zizwi nka Coaster) kandi imodoka irimo internet ifite agapapuro kabigaragaza imbere.

Umwe mu bashoferi batwara imodoka ziva mu mujyi zigana Kimironko, yabwiye IGIHE ko hashize iminsi itatu imodoka zabo zishyizwemo internet.

Umunyamakuru wa IGIHE yagerageje gukoresha iyo internet afungura zimwe mu mbuga za internet, zifunguka byoroshye ugereranyije na internet yari yarashyize muri izo modoka mbere.

Ubinyujije kuri Twitter, Umunyamabanga wa Leta ushinze gutwara abantu n’ibintu, Uwihanganye Jean de Dieu, yanditse ko ubwo yari yicaye mu modoka rusange ituruka Kimironko yerekeza mu mujyi rwagati, yakoresheje iyo nternet ya 4G.

Yagize ati “Internet ya 4G yagarutse mu modoka zitwara abagenzi i Kigali. 50 % by’imodoka hashyizweho utwuma dutanga internet. Gushyiramo utwo twuma bizakomeza, tukaba twizeye kuba twashyizwe mu modoka zose bitarenze Kanama.”

Uretse kuba ibikoresho bya sosiyete yari yahawe gutanga internet mu modoka mbere bitari bijyanye n’igihe, RURA yavuze ko hari n’abashoferi cyangwa aboza imodoka bangizaga udukoresho dutanga internet.

Ikigo AC Group cyahawe gutanga internet mu modoka kimaze imyaka itatu mu Rwanda. Uretse amakarita ya Tap&Go, gifite n’ikoranabuhanga muri buri modoka rifasha kumenya umuvuduko imodoka igenderaho, bigatuma abashoferi batwara neza impanuka zikagabanuka. Mu myaka ibiri gikora, impanuka zagabanutseho 70 %.

PNG - 634.2 kb
Imodoka zitwara abagenzi i Kigali zongeye gushyirwamo internet ya 4G

@Umubavu.com





Tanga igitekerezo kuri iyi nkuru



Igitekerezo