Uzagerazeza kwitambika imbere y’aya matora azahura n’Imana-Perezida Nkurunziza

Perezida w’u Burundi Petero Nkurunziza yabwiye Abarundi ko bagomba guha umwanya abantu bazaza kubigisha gutora ‘YEGO’ ngo itegeko nshinga rihinduke kandi ko uzagerageza kwitambika amatora azahanwa bikomeye.

Ibi Perezida Nkurunziza Petero yabivugiye imbere y’Abarundi ku munsi wa kabiri w’ibikorwa byo kwamamaza amatora y’ihindurwa ry’itegeko nshinga kugirango yemererwe kuzakomeza kwiyamamariza kuyobora Uburundi.

Perezida Nkurunziza yagize ati:”Duhamagariye abenegihugu abazaza kwigisha uko mwatora muzabitabire, mufite umwanya mubitabire, mwumve ibyo bababwira.
Abazababwira gutora YEGO muzabumve, abazababwira gutora OYA nabo nyine nibaboneka muzabumve ariko akari ku mutima nimwe mukazi.”

Perezida Nkurunziza yaburiye umuntu wese uzagerageza kwitambika aya mataora ati:” jyewe mpagaze ahangaha ngo ntangarize Abarundi bose, yaba Umurundi cyangwa umunyamahanga uzagerageza kwitambika imbere y’aya matora azahura n’Imana ishobora byose.”

Aya matora narangira YEGO ariyo igize ubwiganze mu majwi itegeko nshinga ry’Uburundi rizahita rihinduka Perezida Nkurunziza ahite yemererwa gukomeza kuyobora Uburundi kuko umubare wa manda yemerewe uzaba uvanweho.

Perezida Pierre Nkurunziza yagiye anengwa ko ashaka kuguma kubutegetsi kugeza apfuye dore ko yagiye ku butegetsi muri 2005. Mu Ukwakira 2017 guverinoma yari yatangaje ko Nkurunziza azayobora igihugu manda ebyeri zigizwe n’imyaka 14 nyuma ya 2020. Gusa abatavuga rumwe n’ubutegetsi baje kubirwanya bavuga ko bihabanye n’amategeko.

Amavugurura y’itegeko nshinga azemerwa abaturage nibatora ‘yego’ ku majwi 51%. Nkurunziza ayoboye manda ye ya 3. Ubwo yatorwaga muri 2015 abatavuga rumwe n’ubutegetsi bavugaga ko bihabanye n’itegeko nshinga. Habaye imyigaragambyo bituma abarenga 1200 bagasiga ubuzima naho abarenga 400, 000 barahunga.

Abatavuga rumwe n’ubutegetsi bakaba bashinja leta ko abagerageje kurwanya Referandum bahita bafungwa. Mu kwezi gushize komisiyo y’amatora mu Burundi (CENI: Independent National Election Commission) yatangaje ko abaturage bagera kuri Milliyoni 5 aribo biyandikishije kuri listi y’itora.

Amatora ya Referandum mu gihugu cy’u Burundi azaba tariki ya 17 Gicurasi 2018. Akaba ari amatora agamije guhindura itegeko nshinga ry’iki gihugu. Ibi bishobora gutuma perezida Nkurunziza aguma ku butegetsi kugeza 2034.

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo