Umuyobozi wungirije wa Rayon Sports yatawe muri yombi

Kuri uyu wa kabiri tariki ya 19 Ukuboza 2017, Gacinya Chance Denis, Visi Perezida w’ikipe ya Rayon Sports akaba n’umushoramari mu bikorwaremezo, yatawe muri yombi, amakuru yemejwe na Polisi y’u Rwanda.

Umuvugizi wa Polisi y’u Rwanda, ACP Theos Badege, yatangarije IGIHE ko Gacinya yafashwe ku busabe bw’Ubushinjacyaha bw’u Rwanda.

Perezida wa Rayon Sports, Muvunyi Paul, yabwiye IGIHE ko nta kibazo ikipe ifitanye na Gacinya ku buryo yabifatirwa.

Yagize ati “Nibyo yatawe muri yombi na Parike, yahaye urupapuro Polisi iramufata iramufunga ariko ibindi bisobanura ni ibya Parike.”

Umuvugizi w’Ubushinjacyaha bw’u Rwanda, Nkusi Faustin, yatangarije IGIHE ko Gacinya akurikiranweho icyaha gifitanye isano n’isoko atakoze uko bikwiye muri Rusizi.

Yagize ati "Nibyo yafashwe uyu munsi, yafashwe ku busabe bwacu bw’Ubushinjacyaha. Icyaha tumukurikiranyeho, tumukeka kuba yarakoze, ni icyaha giteganywa n’ingingo ya 320 y’igitabo cy’amategeko ahana ibyaha mu Rwanda; ni icyaha cyo kubeshya uwo mwagiranye amasezerano, cyane cyane ku byerekeye ireme rw’ibyo yagombaga gukora."

Yakomeje avuga ko Ubushinjacyaha bufite impamvu zikomeye z’isoko yagombaga gukora mu Karere ka Rusizi ariko akora ibitandukanye n’ibyo yari yemeye.
Ati "Raporo zigaragaza ko ibyo yakoze bidahwanye n’ibyo yari yemeye."

Umuvugizi w’Ubushinjacyaha yirinze kujya muri dosiye, n’isoko Gacinya yaba atarakoze uko yagombaga, avuga ko bizasobanurwa neza mu rukiko.

Iyo ngingo y’icyaha Gacinya akekwaho ivuga ko umuntu wese, ku bw’uburiganya, ubeshya uwo bagiranye amasezerano y’umurimo, ku miterere cyangwa ku ngano y’umurimo wakozwe, ahanishwa igifungo kuva ku mezi atandatu (6) kugeza ku mwaka umwe (1) n’ihazabu y’amafaranga y’u Rwanda kuva ku bihumbi magana abiri (200.000) kugeza kuri miliyoni eshanu (5.000.000) cyangwa kimwe gusa muri ibyo bihano.

Nubwo hatarashyirwa ahagaragara icyo Gacinya akurikiranweho, mu minsi ishize yagiye ashyirwa mu majwi mu kwishyurwa amafaranga y’umurengera mu masoko ya leta.

Muri Nzeri 2017, Komisiyo ishinzwe gukurikirana umutungo wa Leta mu Nteko Ishinga Amategeko (PAC) yahase ibibazo Akarere ka Gatsibo ku ngingo zitandukanye zirimo gusesagura umutungo wa leta, harimo n’aho kishyuye amafaranga y’umurengera rwiyemezamirimo Gacinya Chance Denis, hahita hanavugwa ko no muri Rusizi uyu mugabo yavuzwe.

Abadepite babonye muri raporo y’Umugenzuzi mukuru w’imari ya Leta harimo isoko akarere katanze kuri sosiyete ikuriwe na Gacinya, muri iryo soko hagakoreshwa ibiciro bidasanzwe.

Mu Karere ka Rusizi, bavuze ko yatsindiye isoko ajya kwishyuza miliyoni 240 Frw, ikigo gishinzwe amashanyarazi kigiye gukora igenagaciro ry’ibyakozwe rigaragaza ko bikwiriye miliyoni 10 Frw gusa.

Abadepite basabye ko Gacinya yakurikiranwa kuko hari n’andi masoko yagiye ashyirwa mu majwi.

PNG - 739.3 kb
Gacinya Chance Denis, Visi Perezida w’ikipe ya Rayon Sports watawe muri yombi

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo