Umutoza Karekezi Olivier yasezeye abakinnyi yisubirira muri Sweden atanasabye uruhushya

Umutoza w’ikipe ya Rayon Sports Karekezi Olivier yamaze gusezera ku bakinnyi be ndetse ababwira ko ku mukino wa Shampiyona bafitanye n’ikipe ya Gicumbi kuri uyu wa kane atazabatoza, aho yasubiye muri Sweden kubonana n’umuryango we ndetse bigatera abenshi ubwoba ko bishobora kurangira agiye burundu.

Karekezi Olivier wari ku gitutu cyinshi ashyirwaho n’ikipe ya Rayon Sports cyane cyane abafana, biravugwa ko yagiye adasabye uruhushya ubuyobozi bwe ndetse atazigera agaruka kubera umubano mubi yari afitanye n’ubuyobozi bwe bwifuje kumwirukana kenshi ndetse n’umusaruro we utari mwiza muri iyi minsi.

PNG - 1.1 Mb
Uyu ni Karekezi nyuma y’umukino wa APR FC wasezeraga mu buryo abantu batafinduye


Karekezi yabwiye abakinnyi ba Rayon Spots ko agiye muri Sweden ariko azagaruka mu mpera z’iki cyumweru, ariko amakuru dukesha Ruhagoyacu aratangaza ko aba basore bavuga ko imvugo yabitangajemo yagaragazaga ko amahirwe menshi ari uko atazagaruka i Kigali.

PNG - 1.1 Mb
Karekezi ntabyumva kimwe n’ubuyobozi bwa Rayon Sports


Nubwo yagaragaje ko agifite icyizere cyo kuguma muri iyi kipe yajemo mu ntangiriro z’uyu mwaka w’imikino, abafana bo bakomeje kugaragaza ko batamwishimye ndetse amakuru avuga ko n’umuyobozi wayo, Paul Muvunyi, babanye nabi cyane kuko yashatse kumuzanira Ivan Minnaert ngo bakorane akamwanga.

PNG - 896.2 kb
Rayon Sports yashatse kuzanira Karekezi Ivan Minnaert ngo bakorane abitera utwatsi


Abinyujije ku rubuga rwe rwa Instagram yatangaje amagambo agaragaza ko ashaka gusubira i Burayi kureba umuryango we. Yagize ati “Vuba cyane ndashaka kubona umuryango wanjye.”

PNG - 730.6 kb
Nyuma yuko atsinzwe na APR FC y’abakinnyi 10, nibwo yahise avuga ko ashaka kubona umuryango we bidatinze


Ku mugoroba wo ku Cyumweru nibwo Karekezi yahise anasezera abakinnyi ababwira ko agiye muri Suède kandi ko azagaruka ariko umwe mu bamukurikiranira hafi yagize icyo atangariza umunyamakuru.

Yagize ati “Yatubwiye ko agiye gusura umuryango we bisanzwe azagaruka mu mpera z’iki cyumweru ariko ntitubizi kuko wabonaga yacitse intege cyane, asa n’udusezeraho burundu. N’ubushize agenda yari yatubwiye ariko uko yabikoze noneho biratandukanye cyane.”

Bamwe mu bakunzi n’abafana ba Rayon Sport baganiriye n’itangazamakuru, bavuze ko bishoboka ko uyu mutoza yaba yarumvise indirimbo yaririmbiwe n’abafana ubwo baheruka gutsindwa na APR FC mu mukino uheruka kubahuza,aricyo cyatumye avuga ko agiye gusura umuryango we igitaraganya bikaba ariyo nta ndaro yo gusezera muri iyi kipe yambara ubururu n’umweru.

Uwitwa Rwamuhizi Jean Bosco umukunzi akaba n’umufana wa Rayon Sport yagize ati"Bitewe n’indirimbo abafana ba Rayon Sport baheruka ku ririmbira Karekezi aho bavugaga bati genda karekezi n’igikona cyawe turakurambiwe, ibi bishatse kuvuga ko umutima yakunze APR FC akiyikinira ntaho wagiye kandi nta n’impamvu yo kuyibabaza ari nabyo byatumye avuga ko agiye gusura umuryango we bishobora no gutuma atagaruka gutoza Gikundiro. Gusa ni agahinda gakomeye."

Karekezi yafashe indege mu masaha akuze yo kuri uyu wa Mbere ajyana na Turkish Airlines yerekeza muri Suède kureba umugore we n’abana babiri yari aherutse gusubizayo kuko mbere babaga mu Rwanda kuva yatangira gutoza Rayon Sports.

Karekezi Olivier yageze muri Rayon Sports muri Nyakanga 2017 avuye muri Sweden ndetse mu mezi agera kuri 7 amaze muri Rayon Sports yegukanye igikombe cy’Agaciro Development Fund, icya Super Cup yatsindiyeho APR FC ibitego 2-0, mbere yo kwegukana n’igikombe cy’Intwari tariki ya mbere z’uku kwezi kwa 2.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo