Umutoza Jose Mourinho yirukanywe muri  Manchester United

Nyuma y’imyaka 2 n’amezi agera kuri 5 ari umutoza mukuru w’ikipe ya Manchester United, Jose Mourinho yamaze kwirukanwa nkuko byatangajwe n’iyi kipe ibinyujije kuri Twitter yayo, ikaba igomba gushyiraho umutoza w’agateganyo uzayifasha kugeza mu mpera z’uyu mwaka w’imikino.

Mu itangazo iyi kipe yasohoye kuri uyu wa Kabiri, yavuze ko ishimira Jose Mourinho ku gihe ayimazemo, ikanamwifuriza amahirwe mu kazi ke kari imbere.

Yakomeje igira iti “Umutoza mushya w’agateganyo araza gushyirwaho uzageza mu mpera z’uyu mwaka wa Shampiyona, mu gihe ikipe ikomeje inzira zo gushaka umutoza mushya.”

PNG - 537.1 kb
Manchester United yirukanye umutoza Jose Mourinho, amakuru iyi kipe yemeje ibinyujije kuri Twitter yayo


Mourinho yirukanywe nyuma yo gutsindwa na mukeba Liverpool mu mpera z’iki cyumweru ibitego 3-1, ibintu byababaje cyane abayobozi ba Manchester United bayobowe na Edward Gareth Woodward.

Mu myaka itatu y’imikino Mourinho yari amaze muri iyi kipe yashoye miliyoni £391 yose ariko ntiyashobora kwegukana igikombe cya shampiyona cyangwa Champions League nk’uko abakunzi ba Man United baba babyiteze ku ikipe yabo.

Uyu mutoza yaguze abakinnyi benshi bahenze ariko ntibatanga umusaruro nka; Eric Bailly ($30m) Henrikh Mkhitaryan ($26m), Paul Pogba ($89m), Romelu Lukaku (75m), Nemanja Matic ($40m) Alexis Sanchez ($30m) , Victor Lindelof ($31m), Fred ($50m) na Diogo Dalot ($19m).

José Mourinho wafashije Man Utd gutwara ibikombe bitatu; EFL Cup 2017, Community Shield 2016 na UEFA Europa League 2016–17 yirukanywe akiri mu marushanwa ya Champions League, byahise bimuhesha imperekeza ya miliyoni £26.

Asize Manchester United yinjijwe ibitego 29 mu mikino 16 gusa ya shampiyona, byinshi kurusha ibyo iyi kipe yinjijwe mu mwaka ushize w’imikino wose (28). Iyi kipe ubu irushwa amanota 19 na Liverpool iyoboye urutonde rwa shampiyona, ibintu byaherukaga muri 1962-63.

Byitezwe ko iyi kipe yakomeza gutozwa na Michael Carrick kugeza mu mpeshyi ya 2019. Mu batoza bahabwa amahirwe yo guhabwa iyi kipe barimo Zinedine Zidane uheruka gusezera muri real Madrid. Harimo kandi Laurent Blanc wanabaye myugariro w’iyi kipe.

Mourinho yirukanwe mu gihe mu minsi 895 amaze akorera mu Mujyi wa Manchester, yiberaga muri Lowry Hotel mu gihe umuryango we uba mu Mujyi wa Londres. Bivugwa ko iyi hoteli muri iyi myaka yose amaze kuyishyura £537,000, ahwanye na miliyoni 606.5 Frw.

PNG - 1.1 Mb
Michael Carrick niwe uraba asimbura Mourinho by’agateganyo


@Umubavu.com





Tanga igitekerezo kuri iyi nkuru



Igitekerezo